Úlken Almaty aınalma jolynda 2026 jyldan bastap jolaqy tarıfi ózgeredi
ALMATY. KAZINFORM – Kelesi jyldan bastap Úlken Almaty aınalma avtomobıl jolynda (ÚAAAJ) jolaqy tarıfteri qymbattaıdy.
Kólik mınıstrligi Úlken Almaty aınalma avtomobıl jolynda júrý úshin tólem alý erejelerin qaıta qarap jatyr. Jańa ózgeristerdiń maqsaty — adamdardyń jolaqyny ýaqytynda tóleýin qamtamasyz etý.
Jeńil kólikter úshin tarıf 0,07 AEK-den 0,14 AEK-ge deıin ósip, 605,5 teńge bolady. Basqa sanattaǵy kólikter úshin de tarıf osy kólemde qymbattaıdy. Aınalma jol ákimshiliginiń habarlaýynsha, 2026 jylǵy 1 qańtardan bastap AEK mólsheri boljam boıynsha 4 325 teńge bolady.
Jolaqy burynǵydaı jolda bir saǵat boıy bolý ýaqytyna jáne kólik sanatyna baılanysty esepteledi.
Tarıftiń ózgerýimen birge aldyn ala tólem nemese keıingi tólem jasaǵan jaǵdaıda 50% jeńildik engizý josparlanyp otyr:
• Aldyn ala tólem — aqyly jolǵa kirmeı turyp, jeke shotqa nemese kólik nómirine qarajat aýdarý. Bul kezde paıdalanýshyǵa belgilengen tarıftiń 50% mólsherinde jeńildikpen tóleý múmkindigi beriledi.
• Keıingi tólem — joldy júrip ótkennen keıin 7 kúntizbelik kún ishinde tólem jasaý jol aqysyna 50% jeńildik alýǵa múmkindik beredi.
• Eger tólem kórsetilgen merzim ishinde túspese, 7 kún ótken soń qaryz bop jınalady jáne jolaqyny jeńildiksiz, tolyq mólsherde tóleý kerek.
Sonymen qatar Talǵar, Qarasaı jáne Іle aýdandarynda tirkelgen turǵyndarǵa arnalǵan aılyq jáne jyldyq abonementterdiń quny ózgerissiz qalady.
Aıta keteıik, Úlken Almaty aınalma joly — Almaty qalasyn syrtynan aınalyp ótetin, tranzıttik kólikti qalanyń ishki júrisinen shyǵarý maqsatyndaǵy 66 shaqyrymdaǵy aınalma avtojol. Ol memlekettik menshikke tıesili jáne 2023 jyly Kólik mınıstrligimen jasalǵan kontsessııalyq kelisim aıasynda «BAKAD Investıtsıı ı Operatsıı» JShS basqarýyna berilgen.
Eske salaıyq, buǵan deıin Úlken Almaty aınalma jolynda apattyq turaq aımaqtary ashylǵanyn jazǵanbyz.