Úlken Almaty aınalma jolyn dıagnostıkalaý jumystary bastaldy: jol qaýipsizdigi basty nazarda
ASTANA. KAZINFORM — «Qazaqstan jol ǵylymı-zertteý ınstıtýty» AQ (QazjolǴZI) Qazaqstandaǵy iri ınfraqurylymdyq jáne kólik jobalarynyń biri – Úlken Almaty aınalma avtomobıl jolyn (ÚAAAJ) keshendi dıagnostıkalaý jumystaryna kiristi. Bul týraly Kólik mınıstrligi málim etti.
Búginde ÚAAAJ Almaty qalasy men Almaty oblysynyń kólik júıesinde mańyzdy ról atqarady. Avtomobıl joly qala kóshelerindegi kólik júktemesin azaıtýǵa, tranzıttik kólik qozǵalysyn jedeldetýge jáne óńirdiń logıstıkalyq tıimdiligin arttyrýǵa yqpal etedi. Sonymen qatar joba kólik aǵyndaryn qaıta bólý arqyly eldiń tranzıttik áleýetin damytýǵa, kólik baılanysyn jaqsartýǵa jáne ekologııalyq jaǵdaıdy ońaltýǵa oń áserin tıgizip otyr.
Osyǵan baılanysty joldyń tehnıkalyq jaı-kúıin júıeli baqylaý, ony paıdalanýdyń zamanaýı tásilderin engizý jáne ınfraqurylymnyń uzaq merzimdi ári qaýipsiz jumysyn qamtamasyz etý erekshe mańyzǵa ıe.
— Birlesken jumystar aıasynda QazjolǴZI mamandary jol ınfraqurylymyna keshendi dıagnostıka júrgizýde. Zertteýler barysynda jol jamylǵysynyń jaı-kúıi baǵalanyp, onyń tegistigi, ilinisý koeffıtsıenti men kedir-budyrlyq parametrleri anyqtalady. Sondaı-aq, aqaýlar men buzylýlar anyqtalyp, jol boıyndaǵy kópirler, jol ótkelderi jáne basqa da jasandy qurylystardyń tehnıkalyq jaǵdaıyna tekserý júrgiziledi, — delingen vedomstvonyń habarlamasynda.
Sonymen qatar, jol jamylǵysy men jol konstrýktsııalarynyń naqty tehnıkalyq jaı-kúıi týraly obektıvti derekter alýǵa múmkindik beretin aspaptyq jáne zerthanalyq zertteýler júrgizilýde. Keshendi dıagnostıka nátıjeleri boıynsha QazjolǴZI mamandary ÚAAAJ odan ári kútip-ustaý, jóndeý jáne damytý jóninde ǵylymı negizdelgen usynymdar ázirleıtin bolady.
— Alynǵan nátıjeler avtomobıl jolynyń uzaq merzimdiligi men paıdalaný senimdiligin arttyrýǵa, kútip-ustaý tásilderin jetildirýge, jol tósemesiniń qaldyq resýrsyn baǵalaýǵa, jol qozǵalysy qaýipsizdigin arttyrýǵa, sondaı-aq jol ınfraqurylymyn monıtorıngteý, dıagnostıkalaý jáne tsıfrlyq basqarýdyń zamanaýı ádisterin engizýge negiz bolady, — dep habarlady Kólik mınıstrliginen.
Budan bólek, yntymaqtastyq aıasynda salmaqtyq-gabarıttik baqylaý júıesin jetildirý jumystary júrgizilýde. QazjolǴZI mamandary avtomattandyrylǵan salmaqtyq-gabarıttik baqylaý quraldaryna qoıylatyn talaptardy belgileıtin QR VN «Avtokólik quraldarynyń salmaqtyq jáne (nemese) gabarıttik parametrlerin avtomatty túrde ólsheýge arnalǵan arnaıy avtomattandyrylǵan ólsheý quraly» qujaty jobasynyń alǵashqy redaktsııasyn ázirledi. Atalǵan salada zamanaýı sheshimderdi engizý aýyr salmaqty kólik quraldarynyń qozǵalysyn baqylaý tıimdiligin arttyryp, jol ınfraqurylymynyń saqtalýyn qamtamasyz etýge múmkindik beredi.
Aldaǵy ýaqytta taraptar tsıfrlyq monıtorıng, zııatkerlik kólik júıeleri, derekterdi avtomattandyrylǵan jınaý jáne halyqaralyq standarttar men ozyq salalyq tájirıbelerge sáıkes avtomobıl joldaryn basqarýdyń ınnovatsııalyq tehnologııalaryn engizý baǵyttarynda yntymaqtastyqty odan ári damytýdy josparlap otyr.
Eske sala keteıik, Qazaqstanda 140 myńnan astam jol belgisi tekseriledi.
