Úlken Almaty aınalma jolynda tólem jasaý tártibi ózgerdi
ASTANA. KAZINFORM — Kólik mınıstrligi Úlken Almaty aınalma avtomobıl jolymen (ÚAAAJ) júrý aqysyn alý tártibine ózgerister engizdi. Tıisti ózgerister Qazaqstan Respýblıkasy Kólik mınıstri mindetin atqarýshynyń buıryǵymen bekitildi.
Engizilgen ózgeristerdiń basty ereksheligi — jol júrý aqysyn ýaqytyly tóleıtin paıdalanýshylar úshin tólem mólsheri burynǵy deńgeıde saqtalady.
— Tólemdi ýaqytyly júrgizetin paıdalanýshylar úshin jol júrý quny kólik quralynyń sanatyna qaraı 0,07 AEK-ten (302,75 teńge) 0,22 AEK-ke (951,5 teńge) deıingi mólsherde saqtalady.
Sonymen qatar, buıryqpen negizgi tarıfter qaıta qaraldy. Olar kólik quralynyń sanatyna qaraı 0,14 AEK-ten (605,5 teńge) 0,44 AEK-ke (1903 teńge) deıin belgilengen. Alaıda bul tarıfter jol júrý aqysy tirkelgen kúnnen keıin jeti jumys kúni ishinde tólenbegen jaǵdaıda ǵana qoldanylady, — delingen mınıstrlik habarlamasynda.
Engizilgen ózgerister tólem tártibin saqtaýdy yntalandyrýǵa baǵyttalǵan jáne jol júrý aqysyn ýaqytyly tóleıtin paıdalanýshylarǵa áser etpeıdi.
— Jol júrý qunyn esepteý tártibi ózgerissiz qalady. Burynǵydaı tólem mólsheri kólik quralynyń sanatyna jáne aqyly jol ýchaskesinde bir saǵatqa deıin bolýyna qaraı esepteledi. Júrip ótken qashyqtyq jol júrý aqysyna áser etpeıdi.
Almaty oblysynyń Talǵar, Qarasaı jáne Іle aýdandarynyń turǵyndary úshin qoldanystaǵy jeńildikter de saqtalady. Bul sanattaǵy paıdalanýshylar úshin aılyq jáne jyldyq abonementterdiń quny ózgermeıdi, — delingen habarlamada.
Ózgerister buıryq alǵash resmı jarııalanǵan kúnnen keıin kúntizbelik on kún ótken soń, ıaǵnı 2026 jylǵy 16 tamyzdan bastap kúshine enedi.
Aıta ketelik aqyly avtomobıl joldaryn kimder tegin paıdalana alatyny týraly jazǵan edik.
