Ulytaýlyq jıhankez Eýropany jaıaý aralap, rekord ornatpaq
ASTANA. KAZINFORM – 76 jastaǵy tanymal jıhankez Sársenbaı Qotyrashov endi Eýropa elderin jaıaý kezip ótpek. Ulytaumen esimimen tanymal saıahatshy bas-aıaǵy eki aıda Serbııa, Majarstan, Aýstrııa, Germanııa, Frantsııa baǵytynda jaıaý marafon jasaıdy.
Buǵan deıin jıhankez elimizdiń 17 óńirin aralap, 8 myń shaqyrymdy eńsergen edi. Osylaısha Qazaqstannyń rekordtar kitabyna endi.
Al 2023 jyly S.Qotyrashov Atyraý qalasynan shyǵyp, Reseıdiń Kavkaz ólkelerinen ótip, Grýzııa arqyly Túrkııa Respýblıkasynyń Ystanbul qalasyna jetti.
2024 jyly Óskemen qalasynan shyǵyp, Altaı ólkesi men Monǵolııa arqyly Qytaı astanasy Beıjińge jaıaý jetken. Ondaǵy maqsat – dúnıejúzilik órkenıetke kóshpendilerdiń qosqan úlesin tanytý, jylqyny alǵash qolǵa úıretken, dońǵalaqty, shalbardy, er-turmandy oılap tapqan ata-baba mırasyn dáripteý.
– Eýropa baǵyty – meniń úlken saparymnyń jalǵasy. Búgin túnde Serbııaǵa ushyp, kári qurlyqty 58 kúnde aralap, 26 sáýirde Parıjge jetýdi jobalap otyrmyn. Byltyr saıahatqa aqsha jetpeı qalǵany ras. Sebebi maǵan Úkimet esh qarajat bólmeıdi. Bastaǵan isti aıaqsyz qaldyrýǵa bolmaıdy. Jalpy 40 myń shaqyrymnan asa júrip, Gınnes rekordyna enip, Qazaqstannyń atyn álemge tanytqym keledi. Sebebi Ekvatordyń uzyndyǵy 40 myń shaqyrymdy quraıdy, osy perımerden asýym kerek. Sondyqtan kezekti saparyma barý úshin óz páterimdi sattym, – dedi S. Qotyrashov elordada ótken kezedsýde.
Eýopadan keıin jıhankez ataı Amerıka Qurama Shtattaryna barýdy, Atlant muhtynyń jaǵalaýynan Tynyq muhıtynyń jaǵalaýyna jetýdi kózdep otyr.
Munymen shektelip qalmaı, 40 myń shaqyrymnan asý úshin Afrıka, Orta Azııa jáne basqa kontınentterdi aralap shyǵý josparda.
Gınnestiń álemdik rekordtar kitabyna sáıkes, búgingi kúnge deıin 75 jastan asqan adamnyń jaıaý saıahat jasaýy boıynsha mundaı rekord bolmaǵan.
– Joldyń beıneti de az emes. Alǵash el ishin aralaǵanymda Jezqazǵan-Qyzylorda trassasy qıynǵa soqty. Eshbir eldimeken joq, birli-jarym shaıhana, sharýa qojalyqtary ǵana kezigip, 420 shaqyrymdy on kúnde júrip óttim. Ońtústikte Túlkibas aýdanyndaǵy joǵary-tómen asýlardan ótý qıyn boldy. Túrkııada da bıik taýlardy aınalý óte kóp ýaqyt aldy. Tótesinen júrý úshin 3 shaqyrymǵa jetetin uzyn týnneldiń ishimen júrý qajet boldy. Týnneldiń ishi tas qarańǵy, trotýar joq, beton qýysta kólikterdiń daýysy jańǵyryp, qulaǵyń bitelip qalady. Osylaısha úsh shaqyrym týnneldi 1,5 saǵatqa ázer júrip óttim, – dep eske alady saıahatshy.
Gınnes rekordyn tirkeý úshin saıahatshyǵa arnaıy treker ilinedi, sol arqyly rekordty tirkeý uıymy baqylap otyrady.
Al tildik kedergige ushyramaý úshin S. Qotyrashov ilespe aýdarmashy kómegin paıdalanbaq.
– Balalarym qýanady, «bizdiń atamyz – álemdegi jalǵyz jıhankez qarııa» dep maqtanady. Zamandastaryma aıtarym, eń aldymen qımyl kerek. Qazir qurdastarymnyń arasynda baldaqpen, taıaqpen júrgenderi kóp. Eger densaýlyǵyń myqty bolsyn deseń, shıraımyn deseń, kún saıyn 7 km jaıaý júr. Qan aınalym jaqsarady, taza aýamen demalasyń, jan-jaǵyńdy kóresiń, árkimmen amandasyp, jón surasasyń, ómirge qushtarlyǵyń artady. Adamdy qımyl shıratady. 9 jasymnan beri óndiriste jumys istep kelemin, áli de sol qýatpen kele jatyrmyn, – deıdi S. Qotyrashov.
Buǵan deıin atyraýlyq saıahatshy Berik Esenǵalıevtiń álemdegi eń sýyq jer sanalatyn Oımıakon eldimekenine barǵanyn habarlaǵan edik.
