Ulytaýlyq saıahatshy Ulytaumen óz tańdaýyn jasady
JEZQAZǴAN. KAZINFORM – Jezqazǵan qalasynda Quryltaı depýtattaryn saılaý aıasyndaǵy daýys berý jalǵasyp jatyr. Tańǵy saǵat 10:00-de qaladaǵy №28 saılaý ýchaskesine Ulytaý óńirine tanymal aqsaqal, saıahatshy Sársenbaı Qotyrashov kelip, óziniń azamattyq tańdaýyn jasady.
Ómiriniń jetpisten asqan shaǵynda uzaq saparlarǵa shyǵyp, Qazaqstandy jáne birneshe shet memleketti jaıaý aralaǵan Sársenbaı aqsaqal úshin bul kúnniń máni erekshe.
Saıahatshy 2022 jyly Qazaqstannyń 17 óńirin jaıaý aralap, 8 myń shaqyrymǵa jýyq jol júrip ótken. Bul jetistigi otandyq KInES rekordtar kitabyna engizildi. Keıin ol halyqaralyq joryqtaryn jalǵastyryp, birneshe memleket aýmaǵyn jaıaý eńserdi.
Al, bıylǵy jyly Sársenbaı Qotyrashov 53 kún ishinde Serbııa, Vengrııa, Aýstrııa, Germanııa jáne Frantsııa arqyly shamamen 3 myń shaqyrym jol júrip, Parıjge jetti. Onyń tabandylyǵy men belsendi ómir salty kóptegen qazaqstandyqqa úlgi bolyp otyr.
Saıahatshynyń aıtýynsha, eldi jaıaý aralaý oǵan Qazaqstannyń ár óńirindegi halyqtyń tynys-tirshiligin, salt-dástúri men el azamattarynyń arman-maqsatyn jaqynnan tanýǵa múmkindik bergen.
— Eldiń bolashaǵy ár azamattyń tańdaýyna baılanysty. Sondyqtan daýys berý — jaı ǵana mindet emes, el aldyndaǵy azamattyq jaýapkershilik, — dedi Sársenbaı aqsaqal.
Ol daýys berý ýchaskesine kelgen azamattarǵa aq batasyn berip, eldiń birligi men berekesin, jastardyń bolashaǵy jarqyn bolýyn tiledi.
Aıta keteıik, Sársenbaı Qotyrashovqa 2026 jyly Qazaqstannyń týrızm salasyna qosqan úlesi men belsendi ómir saltyn nasıhattaǵany úshin «Qurmetti sport qyzmetkeri» ataǵy tabystaldy.
Qazirgi ýaqytta № 28 saılaý ýchaskesinde daýys berý protsesi jalǵasyp jatyr. Saılaý ýchaskeleri saǵat 20:00–ge deıin jumys isteıdi.
