Ulytaýlyq metallýrgter Memleket basshysynyń atynan marapattaldy
JEZQAZǴAN. KAZINFORM - Baıytýshylar kúnine oraı Ulytaý oblysynda birqatar sala úzdikteri memlekettik nagradalarmen marapattaldy. Marapattardy QR Premer-Mınıstri Oljas Bektenov óńirge jumys sapary barysynda arnaıy tabys etti.
Atap aıtar bolsaq, «Qurmet» ordenimen QR Ónerkásip jáne qurylys mınıstrligi Ónerkásip komıtetiniń «Jezqazǵansırekmet» RMK dırektory Narıman Abylqanov, III dárejeli «Eńbek dańqy» ordenimen «Kazakhmys Smelting» JShS Jezqazǵan mys balqytý zaýytynyń balqytýshysy Bolat Aıdabolov, «Jezqazǵantústimet» ÓB Qarsaqpaı metallýrgııa zaýytynyń metall quıýshysy Baqtııar Ańsaǵaev, «Kazakhmys Smelting» JShS Jezqazǵan mys balqytý zaýytynyń slesar-jóndeýshisi Seıdahmet Jaqashbaev, Jezqazǵan mys balqytý zaýytynyń tokari Búrkitbaı Ospanov, «Jaırem KBK» AQ karerindegi avtokólik júrgizýshisi Elhýtty Rahymov, «Eren eńbegi úshin» medalimen «Kazakhmys» fılıaly Jezqazǵan baıytý fabrıkalarynyń flotatory Gúlbaný Jumadıldınova, «Kazakhmys Smelting» JShS gıdrometallýrg apparatshysy Júsipbek Kenbaevqa tabystaldy.
«Men úshin erekshe kún. Osy salada jumys istep kele jatqanyma 40 jyl toldy. Osy ýaqyt aralyǵynda óńirimizge qurmet ári elimizdiń ekonomıkasyn damytý jolynda eńbektenip kelemiz. Bul – meniń ǵana emes, barlyq áriptesimniń eseli qyzmetiniń jemisi dep bilemin»-deıdi Jezqazǵan baıytý fabrıkasynyń flotatory Gúlbaný Jumadıldınova.
«Memleket basshysynyń atynan nagrada alý jáne ony Premer-mınıstrdiń arnaıy tapsyrýy – men úshin úlken mártebe. Barsha áriptesimdi aıtýly merekemen quttyqtaımyn. Eńbegimiz elene bersin»-dep atap ótti marapattalýshy Jezqazǵan mys balqytý zaýytynyń balqytýshysy Bolat Aıdabolov.
Marapattaý rásiminde jınalǵan jurtshylyqty quttyqtaǵan Úkimet basshysy Oljas Bektenov sala eńbekkerleriniń el ekonomıkasyna qosqan zor úlesin erekshe atap ótti.
