Ulytaýlyq azamat marganets rýdasyn zańsyz óndirýmen aınalysqan

ASTANA. KAZINFORM - Qarjylyq monıtorıng agenttigi Ulytaý óńirinde marganets rýdasyn ruqsatsyz óndirýge jáne keıin ony zańdastyrýǵa qatysty tergeýdi aıaqtap, isti sotqa jiberdi.

Atalǵan azamat 2020-2023 jyldar aralyǵynda eshqandaı ruqsat qujattarynsyz Ulytaý oblysyndaǵy «Vostochnyı karerinen» marganets rýdasyn zańsyz óndirýmen aınalysqan.

Qylmys «Qazaqstan Ǵarysh Sapary» AQ-nyń aeroǵaryshtyq sýretteriniń kómegimen anyqtaldy.

Jer qoınaýyn óz betinshe paıdalaný faktilerin tergep-tekserý barysynda karer ornalasqan jer ýchaskesin paıdalaný jónindegi ýákiletti organdardan berilmegeni, sondaı-aq joǵaryda atalǵan azamattyń tıisti tirkeýi joq ekeni anyqtaldy.

Keıinnen kúdikti jalǵan shot-faktýralardy jazyp, zańsyz óndirilgen marganets rýdasyn zańdastyryp, respýblıka boıynsha jáne shet memleketterge ótkizgen.

Marganets rýdalary ónerkásiptiń ártúrli salalarynda – metallýrgııada, hımııada, keramıkada, shynyda, al onyń qosylystary – farmatsevtıka ónerkásibinde qoldanylady.

Memleketke 1 mlrd teńgeden astam shyǵyn kelgen.

Zańsyz óndirilgen ken kólemi 16 myń tonnany qurap, jalpy somasy 3 mlrd teńgeden asady.

Kúdiktiniń 337 mln teńgeniń jyljymaly jáne jyljymaıtyn múlki tárkilendi.

QR QPK 201-babyna sáıkes ózge de málimetter jarııa etilýge jatpaıdy.