Ulytaýdaǵy kolonııaǵa kókónis salynǵan sómkelermen 34 telefon alyp ótpek bolǵan
ASTANA. KAZINFORM – 34 telefondy azyq-túlik arasyna jasyryp, kolonııaǵa ótkizbek bolǵandar ustaldy.
№ 62 mekeme qyzmetkerleri sottalǵandardyń paıdalanýyna tyıym salynǵan zattardy jetkizý áreketin toqtatty.
– Azyq-túlik ónimderin tıeý kezinde «Gazel» kóligi tekserildi. Sábiz salynǵan qaptardyń birinde tórt qara tústi plastık «sálemdeme» jasyrylǵan. Ashqan kezde 34 uıaly telefon, 11 qulaqqap, 3 flesh-karta jáne 30 SIM kartasy tabyldy.
Osy fakti boıynsha Jezqazǵan polıtsııa basqarmasynyń tergeý-jedel toby shaqyryldy.
– Qazirgi ýaqytta tyıym salynǵan zattardy jetkizýshiniń mekenjaıyn anyqtaý maqsatynda jedel izdestirý sharalary júrgizilip jatyr, - dep habarlady Qaraǵandy oblysy jáne Ulytaý oblysy boıynsha Qylmystyq izdestirý departamentiniń baspasóz qyzmeti.
QR ÁQBtK-niń 481-babyna sáıkes qylmystyq-atqarý júıesi mekemelerinde, arnaýly mekemelerde, alkogoldik ishimdik, dárilik jáne basqa da zattardy, tyıym salynǵan aqsha, azyq-túlikti tekseristen jasyryp berý nemese kez kelgen tásilmen berýge tyrysý ákimshilik quqyq buzýshylyq jasaý quraly ne nysanasy sanalatyn zatty tárkileı otyryp, on aılyq eseptik kórsetkish mólsherinde eskertý nemese aıyppul salýǵa ákep soǵady.
