Ýlytaýdaǵy hrıstıan zıratyn basqa orynǵa kóshirý qoǵamdyq rezonans týdyrdy
ULYTAÝ. KAZINFORM — Burynǵy Jezqazǵan kentiniń ońtústik bóligindegi hrıstıan zıratynyń qaıta jerleý máselesi áleýmettik jelide qyzý talqyǵa túsken taqyryptardyń birine aınaldy. Jergilikti turǵyndar sanıtarlyq qaýpi men jerlengen marqumdardyń týystarynyń quqyqtary qanshalyqty saqtalǵanyna alańdaýshylyq bildirip otyr.
Qoǵam qaıratkeri Berik Jaǵyrapovtyń áleýmettik jelidegi jarııalanymy jurttyń dúrligýine sebep boldy. Onda ol bolyp jatqan jaǵdaıǵa jáne jergilikti bılik áreketterine ashyq narazylyǵyn bildirgen.
Jarııalanymynda ol jaǵdaıdy moraldyq jáne zańdyq turǵydan «ersi áreket» dep atady:
«Bul endi jaı ǵana tártipsizdik emes — bul ashyq qastandyq», dep jazdy Jaǵyrapov.
Onyń aıtýynsha, qaıta jerleý úderisi óreskel buzýshylyqtarmen júrgizilgen.
«Bastapqyda, turǵyndardyń aıtýynsha, shamamen 250 qabirdi qazyp, máıitterdi bir jerge jınaǵan. Sodan keıin qabir qazyp, qazirgi Satpaev qalalyq zıratynyń janyna jerlep jatyr. Bul ne degen sumdyq?», deıdi qoǵam belsendisi.
Jaǵyrapov qaıta jerleý tek qatań erejelerge sáıkes júrgizilýi tıis ekenin atap ótti:
«Bul — ruqsattarmen, sanıtarlyq normalarmen, SEQ-tiń qatysýymen, týystarǵa habarlaý jáne kelisim alý arqyly júrgiziletin rásim. Al munda barlyǵy astań-kesteń, syrttaı kelise otyryp jasalyp jatqan dúnıe».
Týystarynyń kelisimi máselesine de erekshe nazar aýdaryldy:
«Týystardyń ruqsaty qaıda? Estýimizshe, shamamen 30 adamnan ǵana ruqsat alynǵan. Al qalǵandary she? Bul bıznes nemese damý máselesi emes. Bul — adamgershilik bet-beıneniń joǵalýy. Marqumdarǵa bulaı qııamet jasaýǵa bolmaıdy», dep jazyp, bolyp jatqan jaǵdaıdy «qalany uıatqa qaldyratyn jáne abyroısyzdyqty kórsetip otyrǵan jaǵdaı» dep atady.
Qoǵamdyq rezonansqa baılanysty Ýlytaý aýdany ákimdigi resmı túsinikteme berdi. Bılik qaıta jerleý jumystary barlyq sanıtarlyq-epıdemıologııalyq jáne quqyqtyq talaptarǵa sáıkes júrgizilip jatqanyn, sheshimniń geologııalyq jaǵdaıdyń nasharlaýy jáne topyraqtyń túsip ketý qaýpine baılanysty qabyldanǵanyn habarlady.
«Qaıta jerleýge daıyndyq jáne máseleni jan-jaqty zertteý eki jyldan astam ýaqytty aldy», delingen ákimdiktiń habarlamasynda.
Bıliktiń málimetinshe, zırat aýmaǵynda 1 888 adam jerlengen, onyń 920-synyń jeke derekteri bar, al qalǵan 968 marqumnyń aty-jóni joq.
Ákimdik jumystyń ýákiletti organdardyń ruqsattaryna sáıkes, sanıtarlyq-epıdemıologııalyq qyzmettiń qorytyndylary men Satbaev qalasy ákimdiginiń qaýlysyna negizdelip júrgizilip jatqanyn erekshe atap ótti.
«Qazirgi tańda 507 adamnyń týystarynan marqumdardyń súıegin qaıta jerleýge kelisimi alynǵan. Qalǵan jerleýler boıynsha jumystar qoldanystaǵy zańnamaǵa sáıkes júrgizilip jatyr», delingen resmı túsiniktemede.
Bılik málimetinshe, 850 súıek qaldyqtary belgilengen tártippen qaıta jerlengen. Bul jumysqa 51 maman tartylǵan, onyń ishinde epıdemıolog dárigerler men dezınfektsııalyq qyzmet qyzmetkerleri bar, personalǵa vaktsınatsııa jasalǵan jáne mindetti nusqaýlyq ótkizilgen.
«Qaıta jerleý jumystarynyń barlyq kezeńi Satbaev qalasy ákimdigi men salalyq ýákiletti organdardyń turaqty baqylaýymen júrgiziledi», dep sendirdi oblys ákimdigi.
Sońynda bılik bul taqyryp boıynsha aldyn ala jalǵan aqparat taratý elimizdiń zańnamasyna sáıkes jaýapkershilikke ákep soǵatynyn eskertti.
Eske sala ketsek, byltyr Pavlodardaǵy áıgili saıabaqqa qatysty ańyzdar týraly jazǵanbyz. Ondaǵy saıabaq zırat ornyna salynǵan.