Ulytaýdaǵy geologııalyq klaster tolyq tsıkldi zertteý júıesin damytady
ASTANA. KAZINFORM — Ónerkásip jáne qurylys mınıstri Ersaıyn Naǵaspaev Memleket basshysy Qasym-Jomart Toqaevtyń Qazaqstan aýmaǵynyń geologııalyq turǵyda zerttelý deńgeıin arttyrý jónindegi tapsyrmalary aıasynda Ulytaý oblysynda atqarylyp jatqan jumystar barysyn tekserdi.
Bıyl elimizdiń 20 ýchaskesinde 1:50 000 masshtabtaǵy geologııalyq túsirilim (GT-50) jumystary bastaldy. Zertteý jumystary qamtylǵan aýmaqtyń jalpy kólemi 100 myń km²-den asady, jobalar 11 óńirde júzege asyrylýda. Ulytaý oblysynda 7 ýchaske aýmaǵynda jalpy kólemi 36 myń km² jerdi qamtıtyn keshendi geologııalyq zertteýler júrgizilýde.
Mınıstrge zertteý nysandaryndaǵy aerogeofızıkalyq jáne geologııalyq barlaý jumystaryna engizilip jatqan jańa tásilder tanystyryldy.
Mınıstrliktiń basshylyǵymen mamandar Jerdi qashyqtan zondtaý derekterin ınterpretatsııalaýdy, ushqyshsyz aerogeofızıkalyq keshenderdi qoldanýdy jáne joǵary dáldiktegi Ionic Leach geohımııalyq ádisin paıdalanýdy qamtıtyn keshendi jumystar júrgizýde.
— Jer qoınaýyn keń aýqymda geologııalyq zertteý — Memleket basshysy Qasym-Jomart Kemeluly Toqaevtyń mınıstrlik pen jalpy sala aldyna qoıǵan negizgi strategııalyq mindetteriniń biri. Bizdiń basty mindetimiz — sapaly geologııalyq aqparat alý. Bul geologııalyq barlaý isine ınvestıtsııa tartýǵa jáne ónerkásip salalaryn damytýǵa tikeleı baılanysty, — dep atap ótti Ersaıyn Naǵaspaev.
Jer qoınaýyn memlekettik geologııalyq zertteý (JQMGZ) baǵdarlamasyn iske asyrý aıasynda «Ulttyq geologııalyq qyzmet» AQ basshylyǵymen geologııalyq barlaý kompanııalarynyń toby quryldy.
«Kazakhmys Barlau» JShS Ulytaý oblysynda aeromagnıttik túsirilim, aerogamma-spektrometrııa jáne aerogravımetrııany qamtıtyn ozyq aerogeofızıkalyq zertteýler júrgizýde. Bul ádister qysqa merzim ishinde aýqymdy aýmaqtar boıynsha geofızıkalyq aqparat alýǵa jáne zerttelip jatqan alańdardyń keleshegin jedel baǵalaýǵa múmkindik beredi. Sonymen qatar Ulytaý jáne Abaı oblystarynda jalpy sany 300-ge jýyq uńǵyma burǵylandy.
«Taý-Ken Samuryq» UTK» AQ tobyna kiretin «Qazgeologııa» AQ joǵary dáldiktegi pozıtsııalaý júıelerimen jabdyqtalǵan, RTK-navıgatsııasyn qoldanatyn zamanaýı ushqyshsyz keshenderdi paıdalana otyryp, osyndaı zertteýler júrgizedi. Tsıfrlyq tehnologııalar mamandarǵa ushqyshsyz ushý apparatynyń ushýyn jáne zerttelip jatqan búkil aýmaq boıynsha derekterdiń úzdiksiz alynýyn naqty ýaqyt rejıminde baqylaýǵa múmkindik berip, geologııalyq barlaý jumystarynyń dáldigi men sapasyn qamtamasyz etedi.
Sonymen qatar Jer qoınaýyn memlekettik geologııalyq zertteý (JQMGZ) baǵdarlamasy aıasynda jer qoınaýynyń biryńǵaı tsıfrlyq kadastry qalyptastyrylýda. Ol perspektıvaly árbir ýchaskege elektrondyq pasport jasaýdy kózdeıdi. Bul geologııalyq aqparattyń ashyqtyǵy men qoljetimdiligin arttyryp, ony óńdeý jáne daıyndaý merzimderin qysqartýǵa múmkindik beredi.
Alǵashqy perspektıvaly ýchaskelerdi ınvestorlar úshin 2027 jyldan bastap aýktsıonǵa shyǵarý josparlanýda.
Sondaı-aq mınıstr Geologııalyq klasterge baryp, ondaǵy jumystardyń tolyq tsıklin qalyptastyrý baǵytynda atqarylyp jatqan sharalarmen tanysty. Atap aıtqanda, munda kerndi qabyldaý jáne saqtaý, zerthanalyq taldaý, geofızıkalyq zertteýler jáne basqa da tirlikterdi birtutas júıege biriktirý kózdelgen. Klaster Ortalyq Azııadaǵy eń iri ǵylymı-óndiristik jáne bilim berý keshenderiniń biri sanalady.
Іssapar qorytyndysynda Ersaıyn Naǵaspaev tıisti jumystardy sapaly oryndaý, belgilengen kólemder men merzimderdi saqtaý jóninde birqatar tapsyrma berdi.
