Ulytaýda 27 eldi meken sý tasqyny qaýpi bar aımaqta ornalasqan
ASTANA. KAZINFORM — Premer-mınıstrdiń orynbasary Qanat Bozymbaev Ulytaý oblysynyń sý tasqyny kezeńine daıyndyǵyn tekserdi. Jumys sapary barysynda vıtse-premer Jezdi ózeniniń arnasyndaǵy jaǵdaımen tanysyp, Qarsaqpaı, Sarlyq, Qorǵasyn, Boztumsyq jáne Malshybaı eldi mekenderin sý tasqynynan qorǵaý boıynsha atqarylyp jatqan jumystardy qarap shyqty. Bul týraly Úkimet málim etti.
Sondaı-aq Qarsaqpaı jáne Kenenbaı bógetterin tekserdi. Jezqazǵan qalasynda vıtse-premer Keńgir sý qoımasyna baryp, qala ákiminiń qazirgi jaǵdaı jóninde baıandamasyn tyńdady
— Oblys aýmaǵynda sý tasqyny qaýpi bar 27 eldi meken aıqyndalǵan. Onyń segizinde sý basý qaýpi saqtalyp otyr, al qalǵan 19 eldi mekende júrgizilgen ınjenerlik jáne aldyn alý sharalarynyń nátıjesinde qaýip edáýir tómendedi, — delingen habarlamada.
Sý tasqyny kezeńine daıyndyq aıasynda óńirde 1,6 shaqyrym qorǵanys dambasy salyndy, 3,5 shaqyrym kanal, 3 shaqyrym aryq jáne 350 sý ótkizý qurylysy tazartyldy. Sarysý, Jaman Sarysý, Taldysaı, Qarakeńgir, Jezdi ózenderi, sondaı-aq Keńgir, Aqtasty jáne Jezdi sý qoımalary turaqty baqylaýda tur.
Jedel áreket etý úshin tehnıka, ınertti materıaldar jáne basqa da qajetti resýrstardyń rezervi quryldy. 1 naýryzdan bastap azamattyq qorǵaý kúshteri men quraldary joǵary daıyndyq rejımine kóshirildi.
— Óńirdegi gıdrometeorologııalyq jaǵdaı turaqty. Degenmen kez kelgen ózgeriske jedel áreket etip, qaýip aımaqtarynda táýlik boıy monıtorıng júrgizý qajet. „Qazgıdromet“ boljamyna sáıkes Sarysý jáne Keńgir ózenderinde sý deńgeıiniń qaýipti mejege deıin kóterilý yqtımaldyǵy bar. Jańaarqa aýdanynda qaýip joǵary, al Ulytaý aýdanynda ortasha deńgeıde. Osyǵan baılanysty Sarysý jáne Tereńbutaq ózenderiniń arnalaryn tazartý jumystaryn jedeldetý qajet, — dedi Qanat Bozymbaev.
Vıtse-premer oblys ákimdigine tıisti qyzmettermen birlesip eldi mekenderdi sý tasqynynan qorǵaý boıynsha aldyn alý sharalaryn kúsheıtýdi tapsyrdy. Atap aıtqanda, qysqa merzimde ózen arnalary men sý ótkizý qurylystaryn tazartý jumystaryn aıaqtaý, sý deńgeıin turaqty baqylaýda ustaý, gıdrotehnıkalyq nysandardyń daıyndyǵyn tekserý jáne jaǵdaı kúrdelengen jaǵdaıda halyqty evakýatsııalaý josparlaryn jańartý tapsyryldy.
Eske sala keteıik, buǵan deıin Qanat Bozymbaev Abaı oblysynyń sý tasqynyna daıyndyǵyn teksergen bolatyn.