Ulytaýda jylqylardyń qyrylýyna kim kináli – Aıdarbek Saparov jaýaby
ASTANA. KAZINFORM – Ulytaý oblysynda qysta 360 bas jylqy qyrylǵan. Bul týraly Aýyl sharýashylyǵy mınıstri Aıdarbek Saparov aıtty.
«Mınıstrlik bul máselemen baıypty túrde aınalysyp jatyr. 1 naýryzdan bastap Ulytaý oblysyna bardyq. Qazirgi ýaqytta ol jaqta vıtse-mınıstr, Mal sharýashylyǵy departamentiniń dırektory júr. Jalpy, aýa raıynyń kúrdeli bolýyna baılanysty jylqynyń qyrylýy oryn aldy. Eń aldymen, kúnde mal azyǵyn daıyndaý jumysyn júrgizgen kezde barlyq oblys jem-shóptiń 100 paıyz daıyndalǵany týraly esep berdi. Bul úshin aýdandar mpen aýyldyq okrýgterdiń ákimderi jaýap beredi. Munan bólek, Ulytaý aýdanynda jem-shóp daıyndaýǵa 1,4 mlrd teńge sýbsıdııa bólindi. Ol jem-shóp daıyndaýǵa jumsaldy», - dedi mınıstr Úkimet otyrysynan keıingi brıfıngte.
Onyń atap ótýinshe, óńirde 360 bas jylqy qyrylǵan. Degenmen, bul sońǵy derek emes. Qazirgi ýaqytta qyrylǵan jylqy basyna anyqtaý jumystary jalǵasyp jatyr.
«Jaýapkershilik tek ákimdikterge ǵana emes, sonymen birge maldyń ıesine de júkteledi. Olar maldy baǵýǵa, jem-shóbin daıyndaýǵa jaýap berýi tıis. Eger de jem-shóp daıynadýǵa qatysty problema bolǵan jaǵdaıda aýyldyq nemese aýdandyq ákimdikterge júginýi tıis edi. Olar sheshim qabyldaýy tıis bolatyn. Barlyǵy da jem-shóp 100 paıyz daıyn dep esep berdi. Eger oblys bul máseleni sheshe almaǵanda kórshi óńirlerden jetkizer edik. Qazirgi ýaqytta ólgen 360 bas jylqynyń ıesin taba almaı jatyrmyz. Bizde aýyl sharýashylyǵy janýarlaryn birizdendirý bazasy bar. Osy bazada qyrylǵan jylqylar joq. Demek, ıesiz degen sóz. Jibere salǵan, eshkim qaramaıdy. Olar ár basqa aqsha tóleýi tıis. Sondyqtan mal ıelerine de suraqtar bar», - dedi Aıdarbek Saparov.
