Ulytaýda Janat Hadjıev atyndaǵy halyqaralyq teatrlar festıvali ashyldy
JEZQAZǴAN. KAZINFORM — Búgin Ulytaý oblysynda Qazaqstannyń eńbek sińirgen qaıratkeri, «Qurmet» ordeniniń ıegeri, táýelsiz «Tarlan» syılyǵynyń laýreaty, kórnekti qazaq rejısseri Janat Hadjıev atyndaǵy halyqaralyq teatrlar festıvaliniń ashylý saltanaty ótti.
Festıvaldiń qurmetti qonaǵy – Qazaqstannyń halyq artısi, Memlekettik syılyqtyń laýreaty Tuńǵyshbaı Jamanqulov, sondaı-aq Janat Hadjıevtiń jubaıy Rashıda hanym boldy.
Bul – Serke Qojamqulov atyndaǵy qazaq mýzykalyq-drama teatrynyń bastamasymen tórtinshi ret uıymdastyrylyp otyrǵan óner merekesi.
Saltanatty ashylý rásiminde sóz sóılegen Ulytaý oblysynyń ákimi Dastan Ryspekov qonaqtar men qatysýshylardy quttyqtap, festıvaldiń óńirdiń mádenı ómirindegi mańyzdylyǵyn atap ótti:
– Ulytaý – ultymyzdyń altyn besigi. Osy qasıetti mekende ótip jatqan óner merekesi shyǵarmashylyq yntymaqtastyqty nyǵaıtyp, ulttyq ónerimizdiń órisin keńeıtedi dep senemin. Festıvalge qatysýshylarǵa tabys, al kórermenderge jarqyn áser tileımin, – dedi aımaq basshysy.
Janat Hadjıev atyndaǵy halyqaralyq teatrlar festıvali 16 qyrkúıekke deıin jalǵasady. Osy kúnderi elimizdiń birqatar teatrlary men Reseı, Qyrǵyzstan elderiniń óner ujymdary óz qoıylymdaryn usynyp, baq synaıdy.