Ulytaýda XXXIV respýblıkalyq «Ulytaý úni» festıvali bastaldy
JEZQAZǴAN. KAZINFORM — Ulytaý tórinde halyq shyǵarmashylyǵynyń respýblıkalyq XXXIV dástúrli «Ulytaý úni» festıvali óz shymyldyǵyn ashty, dep habarlaıdy oblys ákimdiginiń baspasóz qyzmeti.
Ulttyq ónerdi ulyqtaǵan mádenı sharaǵa elimizdiń ár óńirinen ónerpazdar, óner salasynyń maıtalmandary, shyǵarmashylyq ujymdar men qonaqtar jınaldy.
Festıvaldiń ashylý saltanatynda Ulytaý oblysynyń ákimi Eset Baıken qatysýshylar men qonaqtarǵa quttyqtaý sóz sóılep, ulttyq ónerdi saqtaý men damytý, dástúr sabaqtastyǵyn jalǵastyrýdyń mańyzyn atap ótti.
Úsh kúnge josparlanǵan festıval aıasynda dástúrli án, jyr, terme, aıtys, estrada jáne aspaptyq óner baǵyttary qamtylady. Sonymen qatar jas talanttar men tájirıbeli ónerpazdardyń basyn qosatyn túrli baıqaý uıymdastyrylady.
Festıvaldi tarıhı is-sharanyń bastaý alǵan sátinen qatysqan óner maıtalmandary bastap, búgingi býyn ónerpazdary jalǵady.
Festıval baǵdarlamasy aldaǵy úsh kún boıy Ulytaý oblysynyń óner jáne mádenıet nysandarynda jalǵasady. Búgin saǵat 11:00–de dástúrli án baıqaýy ótse, Jezqazǵan qalasyndaǵy «Shabyt» balalar men jasóspirimder shyǵarmashylyq ortalyǵynda Álıhan Bókeıhanovtyń 160 jyldyǵyna arnalǵan mýltıaspapshylar baıqaýy uıymdastyrylady.
