Ulytaýda týrızm salasyna 3 mlrd teńge ınvestıtsııa tartylǵan

JEZQAZǴAN. KAZINFORM — Bıyl alǵash ret Ulytaý oblysynyń bıýdjetinen týrızmdi damytýǵa 100 mln teńge bólindi. Týrıstik áleýet týraly óńir ákimi Dastan Ryspekov aıtyp berdi.

Ákimniń aıtýynsha, týrızm oblys ekonomıkasyn ártaraptandyrý jónindegi mańyzdy baǵyttardyń biri sanalady. 

— Jyl basynan beri týrızm salasyna tartylǵan ınvestıtsııa kólemi 46%-ǵa ósip, 3 mlrd teńgeni quraǵan. Ornalastyrý oryndary kórsetken qyzmetter 23%-ǵa ósip, 612,8 mln teńgeni qurady jáne 22 myńnan asa adamǵa qyzmet kórsetti, — dedi ákim elordada Ortalyq kommýnıkatsııalar qyzmetinde. 

Oblys ortalyǵy Jezqazǵannan Astana, Almaty, Qaraǵandy jáne Shymkent qalalaryna turaqty áýe qatynasy bar jáne aptasyna 46 reıs júrgiziledi. 
Týrıster sanynyń jyl saıyn ulǵaıýyna baılanysty jańa qonaqúı keshenderin salý qajettiligi bar. Bıyl jalpy quny 1,9 mlrd teńgeni quraıtyn taǵy 3 qonaqúı paıdalanýǵa beriledi.

— Bıyl alǵash ret Ulytaý oblysynyń bıýdjetinen týrızmdi damytýǵa 100 mln teńge bólindi. Bul qarajat óńirdiń týrıstik áleýetin arttyrýǵa baǵyttalyp, birqatar aýqymdy is-sharalar uıymdastyryldy. Mádenı baǵyttaǵy sharalar aıasynda tanymdyq týrlar, «Uly dala samaly men dámi» respýblıkalyq batpyraýyq jáne gastronomııalyq festıval, sondaı-aq halyqaralyq deńgeıde týrızmdi belsendi nasıhattaý maqsatynda «Dala energııasy» djıp-týry ótkizildi, — deıdi D. Ryspekov. 
Bul jobalar arqyly Qazaqstan men TMD elderine Ulytaý oblysynyń tabıǵı baılyǵy, tarıhı oryndary jáne ekotýrızm áleýeti tanystyrylǵan.

Týrıstik ınfraqurylymdy damytý maqsatynda Sátbaev qalasynan Joshy han keshenine deıin avtojol salynyp jatyr. Sondaı-aq, jekemenshik ınvestıtsııalar esebinen Tasbulaq aýmaǵy abattandyryldy.

Aıta keteıik, 2026 jyly Jezqazǵannan Balqash pen Túrkistan qalalaryna jańa áýe reısteri ashylady.