Ulytaýda taý-ken salasynyń kóshbasshylaryn daıarlaıtyn jańa ýnıversıtet ashylady
ULYTAÝ. KAZINFORM — QR Ǵylym jáne joǵary bilim mınıstrligi men «Qazaqmys korporatsııasy» JShS ózara yntymaqtastyq týraly memorandýmǵa qol qoıdy. Osy qujat aıasynda Ulytaý oblysynda jańa ınnovatsııalyq joǵary oqý orny — Ulytaý ýnıversıteti qurylmaq. Memorandýmǵa Ǵylym jáne joǵary bilim mınıstri Saıasat Nurbek pen «Qazaqmys» korporatsııasynyń Basqarma tóraǵasy Nurahmet Nýrıev qol qoıdy.
Joba óńirdiń ǵylymı bilim berý ınfraqurylymyn damytýǵa, taý-ken-metallýrgııa kesheni úshin joǵary bilikti kadr daıarlaýǵa jáne zamanaýı bilim berý ekojúıesin qalyptastyrýǵa baǵyttalǵan. Jańa ýnıversıtet bilim, ǵylym, ónerkásip bir arnaǵa toǵysqan alańǵa aınalady jáne Ulytaý oblysynyń ekonomıkalyq, áleýmettik áleýetin kúsheıtýge yqpal etedi.
Oqý orny AQSh-tyń Colorado School of Mines jáne Qazaqstannyń Satbayev University-men yntymaqtastyq ornatýdy kózdep otyr. Stýdentterge halyqaralyq standartqa saı baǵdarlama jáne ozyq zertteýler men tehnologııalarǵa qol jetkizý múmkindigi usynylady. Oqý úderisin kelesi akademııalyq oqý jylynda bastaý josparlanǵan.
Ýnıversıtettiń ınfraqurylymyna oqý korpýsy, 140-150 oryndyq jataqhana, sport kesheni jáne zamanaýı R& D-ortalyq kiredi. Munda jańa tehnologııalar ázirlenip, paıdaly qazbalardy óndirý men óńdeýdiń tıimdiligin arttyrýǵa baǵyttalǵan ǵylymı zertteýler men jobalar júzege asyrylady.
Ǵylym jáne joǵary bilim mınıstrligi bilim berý baǵdarlamalaryn iske qosý kezinde ádistemelik jáne konsýltatsııalyq qoldaý kórsetedi. Qazaqmys oqý baǵdarlamalaryn qarjylandyrýdy, uıymdastyrýdy jáne qajet bolǵan jaǵdaıda memlekettik grant tartý arqyly birlesip qarjylandyrýdy óz moınyna alady.
Kompanııa bul jobany Qazaqstannyń ǵylymı áleýetin nyǵaıtý jáne jańa býyn ınjenerleri men zertteýshilerin daıarlaý jolyndaǵy strategııalyq qadam retinde baǵalaıdy.
— Jezqazǵanda biz geologııa men ınjenerlik bilim berýdi damytý jolynda mańyzdy qadam jasadyq — ýnıversıtetti, bıznes pen halyqaralyq seriktesterdi birtutas ekojúıege biriktirgen Geologııalyq klasterdi iske qostyq. Bul jaı ǵana jańa kampýs emes, bul kadr daıarlaýdyń jańa tásili, — dedi mınıstr Saıasat Nurbek.
Taý-ken salasyndaǵy álemdegi eń myqty ýnıversıtetterdiń biri — Colorado School of Mines-ty seriktes etý úzdik jahandyq tájirıbeni engizýge, birlesken ǵylymı zertteýlerdi iske qosýǵa jáne álemdik deńgeıde básekege qabiletti mamandar daıarlaýǵa múmkindik beredi. Ulytaý oblysy úshin bul joba — jańa jumys oryndaryn ashyp, jastardy tartatyn draıverge aınalsa, Qazaqstan úshin — shıkizattyq ekonomıkadan bilim men tehnologııaǵa negizdelgen ekonomıkaǵa kóshýge baǵyttalǵan mańyzdy qadam bolmaq.