Ulytaýda sottalǵandardy azaptaǵan túrme qyzmetkerleri apellıatsııalyq shaǵym túsirdi
ASTANA. KAZINFORM — Ulytaý oblysynda jazasyn óteýshilerdi azaptady dep isti bolǵandar sot úkimimen kelispeıtindigi týraly apellıatsııalyq shaǵym túsirdi.
Bıyl 30 shildede Jezqazǵanda qylmystyq ister jónindegi mamandandyrylǵan aýdanaralyq áskerı soty ІІM Qylmystyq-atqarý júıesi komıtetiniń Qaraǵandy jáne Ulytaý oblysy boıynsha № 62 mekemesiniń 7 qyzmetkeri men Ulttyq ulan № 6505 áskerı bóliminiń 4 qyzmetkerine — jalpy 11 adamǵa sot úkimin jarııalady.
Osy is boıynsha taıaýda Záýresh Januzaqova esimdi adam áleýmettik jelide túzeý mekemesinde teolog qyzmetin atqarǵan uly Aıdar Ahmetjanovtyń jazyqsyz sottalǵanyn aıtyp, Memleket basshysynan kómek surady.
«2023 jyly 31 mamyrda balam túrmedegi baǵynbaýshylyqty basý úshin jumysqa dabylmen shaqyrtylǵan. Asa aýyr qylmys jasap sottalǵandar óz-ózderin qasaqana jaralap, sýıtsıd jasamaq bolady. Oqıǵa kezinde jazasyn óteýshiler mekeme qyzmetkerlerine shabýyl jasaıdy, pogondaryn julady, vıdeotirkegishterin syndyrady. Balama sottalǵandardyń birin tepti degen aıyp taǵylady. Alaıda saraptama jazasyn óteýshiniń eshqandaı soqqy almaǵanyn kórsetti. Beınejazbadan da balamnyń ony tepkeni anyqtalmaıdy. Soǵan qaramastan, balama aýyr qylmys týraly aıyp taǵyldy. Sottalǵannyń ózi teolog qyzmetindegi Aıdardyń qatysy joqtyǵyn aıtyp, tıisti ótinishti sotqa ótkizedi. Sot otyrysynda ol ótinishti óz erkimen jazǵanyn birneshe ret aıtady. Saraptama qorytyndysyna qaramastan, balam 4 jylǵa sottalyp ketti. Atalǵan mán-jaıǵa baılanysty balamnyń isin qaıta qaraýdy suraımyn», — dep málimdedi Záýresh Januzaqova.
Bul turǵyda Ulytaý oblysy prokýratýrasy 2024 jyldyń 30 shildesinde sot úkimi boıynsha mekeme bastyǵy men onyń rejım jónindegi orynbasaryna 6 jyl 6 aı merzimge bas bostandyǵynan aıyrý jazasy, sondaı-aq osy mekemeniń 5 jáne áskerı bóliminiń 4 qyzmetkerine 4 jyl men 4,5 jyl merzimine bas bostandyqtarynan aıyrý túrindegi jaza qarastyrylǵanyn habarlady.
«Atap aıtqanda, Quqyq qorǵaý qyzmeti týraly zańnyń 14-baby negizinde quqyq qorǵaý organdarynyń qyzmetkerleri memlekettik bıliktiń ókilderi sanalady. Laýazymdyq nusqaýlyqqa sáıkes, sottalǵan A. Ahmetjanov QR Konstıtýtsııasyn, QR zańdaryn, onyń ishinde „Quqyq qorǵaý qyzmeti týraly“ jáne QR ІІM vedomstvolyq normatıvtik-quqyqtyq aktilerin, QR ІІM, QR ІІM QAJK, Qaraǵandy oblysy jáne Ulytaý oblysy boıynsha QAJD buıryqtaryn, onyń ishinde óziniń laýazymdyq nusqaýlyǵyna sáıkes júzege asyrýǵa mindetti. Qazaqstan Respýblıkasy Konstıtýtsııasynyń 17-baby aıasynda adamnyń qadir-qasıetine qol suǵylmaıdy. Eshkimdi azaptaýǵa, oǵan zorlyq-zombylyq jasaýǵa, basqadaı qatygezdik nemese adamdyq qadir-qasıetin qorlaıtyndaı jábir kórsetýge nemese jazalaýǵa bolmaıdy. „Qylmystyq atqarý júıesi mekemelerinde ustalatyn adamdardyń minez-qulqyn baqylaý men qadaǵalaýdy júzege asyrý jónindegi qyzmetti uıymdastyrý“ týraly QR ІІM 2017 jylǵy 20 aqpanyndaǵy № 36 buıryǵynda mekeme qyzmetkerleriniń zańdy is-áreketteri jazylǵan, ıaǵnı sottalǵandardy oqshaýlap jáne jappaı tártipsizdikke ulasýyna jol bermeý sharalaryn qabyldaý qajet. Alaıda isti tergeý barysynda atalǵan buıryq talaptary mekeme qyzmetkerleri tarapynan oryndalmaǵany anyqtaldy», — delingen Ulytaý oblysy prokýratýrasy málimetinde.
Osy oraıda prokýratýra oqıǵa bolǵan jerden alynǵan beınejazbany qaraý barysynda sottalǵandar tarapynan mekeme qyzmetkerleriniń zańdy talaptaryna baǵynbaý nemese qarsylyq kórsetken áreketteri anyqtalmaǵanyn málimdedi.
«Bul jerge A. Ahmetjanov dabyl belgisi jarııalanǵan soń kelip, zańǵa qaıshy is-áreket jasaǵan. Sotqa deıingi tergep-tekserý barysynda sottalǵan A. Ahmetjanovtyń qylmystyq quqyq buzý áreketin jasaǵandyǵyn áshkereleıtin dáleldemeler jınaqtaldy. Jábirlenýshilerdiń ári kýágerlerdiń jaýaptarymen, saraptama qorytyndylarymen, júrgizilgen bettestirý tergeý áreketteri jáne oqıǵa bolǵan jerden alynǵan beınejazbalarmen dáleldenedi», — dep naqtylady oblystyq prokýratýra.
Aıta keteıik, qazirgi kezde bul oqıǵa boıynsha isti bolǵandar birinshi satydaǵy sot úkimimen kelispeıtindigi týraly apellıatsııalyq shaǵym túsirgen. Atalǵan is apellıatsııalyq satydaǵy sotta qaralady.
Al, Qylmystyq-atqarý júıesi komıteti qaraıtyn Іshki ister mınıstrligi kelesideı túsinik berdi.
«Tótenshe jaǵdaı týyndaǵan kezde (onyń ishinde qamaýdaǵy adamdardyń búlik jasaýy) qyzmettegi barlyq attestattalǵan qyzmetkerler Quqyq qorǵaý qyzmeti týraly zańǵa sáıkes áreket etýge mindetti. Qylmystyq sot isin júrgizý Qylmystyq-protsestik kodekspen belgilengen tártipte aıqyndalady. Qylmystyq is boıynsha sotqa deıingi tergep-tekserýdi óz quzyreti sheginde júzege asyrýǵa ýákiletti laýazymdy adam istiń mán-jaıyn jan-jaqty, tolyq jáne obektıvti zertteý úshin barlyq sharalardy qoldanady. Sonymen qatar, QR Konstıtýtsııasynyń 77-babyna sáıkes, sot tóreligin iske asyrý jónindegi sottyń qyzmetine qandaı da bolsyn aralasýǵa jol berilmeıdi jáne ol zań boıynsha jaýapkershilikke ákep soǵady», — delingen ІІM aqparatynda.
