Ulytaýda rezonansty oqıǵaǵa qatysy bolǵan stýdenttik ombýdsmen 10 táýlikke qamaldy
JEZQAZǴAN. KAZINFORM - Jol qozǵalysy erejelerin óreskel buzý faktileri túsirilgen beınejazbadan keıin qoǵam nazaryn aýdarǵan jastar uıymy ókiline qatysty ákimshilik is boıynsha sot sheshimi shyqty. Oqıǵa Ulytaý oblysynda keń qoǵamdyq talqyǵa túsken úılený kortejine baılanysty boldy.
Qarajal qalalyq soty «Qazaqstan stýdentteri alıansynyń» 24 jastaǵy jetekshisi, stýdent ombýdsmenge qatysty ákimshilik isti qarady. Sot ony usaq buzaqylyq jasaǵany úshin kináli dep tanyp, 10 táýlikke ákimshilik qamaýǵa alý týraly sheshim shyǵardy.
– Ustalǵan azamatqa 10 táýlikke ákimshilik qamaqqa alý jazasy taǵaıyndaldy, – dep habarlady Ulytaý oblysy sotynyń baspasóz qyzmeti.
Oqıǵa ótken demalys kúnderi áleýmettik jelilerde qyzý talqylanǵan úılený kortejine qatysty boldy. Jelide taraǵan beınejazbada birneshe avtokólik qozǵalys kezinde jol erejelerin óreskel buzǵany baıqalǵan.
Beınejazbany kortejge qatysqan azamat túsirgen. Kadrlarda onyń jol talǵamaıtyn kóliktiń lıýginen shyǵyp, smartfon arqyly aınaladaǵy jaǵdaıdy vıdeoǵa túsirip jatqany kórinedi. Keıin atalǵan materıal Instagram áleýmettik jelisinde jarııalanyp, kópshilik arasynda keń taraldy.
Beınejazbaǵa baılanysty Ulytaý oblysynyń polıtsııa departamenti tekserý júrgizdi. Quqyq buzýshylyqtarǵa jol bergen kólik júrgizýshilerine qatysty tıisti sharalar qabyldanyp, avtokólikter arnaıy turaqqa ornalastyryldy. Nátıjesinde 22 ákimshilik hattama toltyrylyp, bes júrgizýshi kólik basqarý quqyǵynan aıyryldy.
Sot otyrysy barysynda aıyptalýshy óz kinásin moıyndap, bolǵan jaǵdaıǵa ókinish bildirdi.
Іs mán-jaıyn saralaǵan sot 20 AEK kólemindegi aıyppul bul jaǵdaıda jetkilikti jaza bolmaıdy degen qorytyndyǵa keldi. Osyǵan baılanysty stýdenttik ombýdsmenge 10 táýlik merzimge ákimshilik qamaq túrindegi jaza taǵaıyndaldy.
