Ulytaýda polıtseıler tikushaqtyń kómegimen eki qarasora plantatsııasyn anyqtady
JEZQAZǴAN. KAZINFORM — «Qarasora-2024» jedel aldyn alý is-sharasy barysynda Ulytaý oblystyq Polıtsııa departamentiniń qyzmetkerleri QR ІІM Ulttyq ulan tikushaǵynyń kómegimen Jańaarqa jáne Ulytaý aýdandarynda eki qarasora plantatsııasyn tapty, – dep habarlaıdy Polisia.kz.
Jańaarqa aýdanynda 942 qarasora butasy, ósimdikterdi sýarýǵa jáne óńdeýge arnalǵan qurylǵy tárkilendi. Qazirgi ýaqytta quramynda esirtki zattary bar tyıym salynǵan ósimdikterdi zańsyz ósirýge qatysy bar adamdardy anyqtaý boıynsha jedel-izdestirý is-sharalary júrgizilip jatyr.
Ulytaý aýdanynda polıtsııa qyzmetkerleri 280 qarasora butasyn taýyp, tárkiledi. Sondaı-aq osy ósimdikterdi ósirýmen aınalysqan Qyzylorda oblysynyń turǵynyn ustady. Kúdiktige qatysty Ulytaý aýdanynyń soty qamaýǵa alý túrindegi bultartpaý sharasyn tańdady. Saraptama qorytyndysyna sáıkes, zertteýge usynylǵan butalar birinshi jáne ekinshi jaǵdaıda qarasora tuqymdas ósimdik bolyp tabylady.
Eki fakti boıynsha da qylmystyq is qozǵaldy. Tergeý júrgizilip jatyr. «Qarasora-2024» jedel aldyn alý is-sharasy aıasynda oblystyq polıtsııa departamenti esirtki qylmysynyń 31 faktisin anyqtady. Zańsyz aınalymnan 500 keliden astam esirtki tárkilendi, sonymen qatar 2000-ǵa jýyq qarasora butalary tabyldy.
