Ulytaý oblysynda kópsalaly klınıka salýdyń qajeti joq – Úkimet
ASTANA. KAZINFORM – Premer-mınıstr Oljas Bektenov Májilis depýtaty Amanjol Áltaevtyń Ulytaý oblysynda onkologııa, perınataldyq jáne jedel járdem baǵyttarymen qamtylǵan zamanaýı kópsalaly klınıkalyq ortalyq salý kerektigi týraly saýalyna jaýap berdi.
- Óńir halqyna onkologııalyq kómektiń sapasy men qoljetimdiligin arttyryp, bıýdjet qarajatyn tıimdi jáne utymdy paıdalaný úshin Ulytaý oblysy Densaýlyq saqtaý basqarmasynyń «Jezqazǵan qalasynyń oblystyq kópsalaly aýrýhanasy» ShJQ KMK (budan ári – OKA) qoldanystaǵy ǵımaratyn qaıta jańartý jáne 100 tósek-oryndyq jańa korpýsqa japsarlas qurylys salý jobasyn iske asyrý týraly sheshim qabyldandy. Jobany iske asyrý merzimi – 2025-2027 jyldar. Bul rette qurylys kezeńinde óńir halqyna qajetti kólemde onkologııalyq kómek kórsetý úshin 2025 jyldyń sońyna deıin OKA bazasynda 20 tósek-oryndyq onkohırýrgııalyq bólimshe ashý máselesi qaralyp jatyr, - dep jazady Premer-mınıstr.
Al qosymsha qurylys aıaqtalǵannan keıin bosaıtyn OKA alańy perınataldyq tósek-orynǵa degen naqty suranysty jabatyn, halyq talabyna sáıkes keletin tolyqqandy perınataldyq bólimshege aınalady.
- Osy is-sharany iske asyrý nátıjesinde óńirde kórsetiletin medıtsınalyq qyzmetterdiń qoljetimdiligi men sapasy aıtarlyqtaı jaqsarady. Halyqqa shuǵyl medıtsınalyq kómektiń qoljetimdi bolýyn ári ony ýaqytyly kórsetýdi qamtamasyz etý úshin jedel medıtsınalyq járdem stantsııasyn uıymdastyrý máselesin mobıldi qosalqy stantsııany ornalastyrý arqyly sheshý josparlanyp otyr. Atalǵan shara, ásirese jumys istep turǵan bazalardan alys eldi mekenderde, shaqyrýlarǵa jedel den qoıýǵa, sondaı-aq jedel medıtsınalyq kómektiń qoljetimdilik kórsetkishterin jaqsartýǵa múmkindik beredi, - dep jazylǵan jaýapta.
Buǵan deıin Ulytaý oblysynyń densaýlyq saqtaý júıesin damytýdyń keshendi jospary bekitilgenin jazǵan edik.