Ulytaýda muǵalimder kúnine oraı úzdik bilim uıymdaryna 6 mıllıon teńgelik syıaqy tabystaldy
JEZQAZǴAN. KAZINFORM — Ulytaý oblysynda Muǵalimder kúnine arnalǵan «Ustaz — ulttyń shamshyraǵy» saltanatty jıyny ótti.
Merekelik sharaǵa oblys ákimi Eset Baıken qatysyp, ustazdar qaýymyn kásibı merekesimen quttyqtady.
Saltanatty jıynda bilim salasynyń damýyna úles qosyp júrgen birqatar pedagogke memlekettik jáne vedomstvolyq marapattar tabystaldy. Ustazdar «Qurmet» ordenimen, «Eren eńbegi úshin» medalimen, «Eńbek ardageri», «Ybyraı Altynsarın» medaldarymen, sondaı-aq Oqý-aǵartý mınıstrliginiń «Orta bilim berý isiniń úzdigi» qurmet dıplomymen jáne Alǵys hattarymen marapattaldy. Sonymen qatar Ulytaý oblysynyń Qurmet gramotalary tabystaldy.
Sondaı-aq «Ulytaý bilim úzdigi» nomınatsııasynyń jeńimpazdaryna 1 mıllıon teńgeden syıaqy berilip, úzdik bilim berý uıymdaryna 6 mıllıon teńgelik sertıfıkattar tabystaldy.
— Ustaz — urpaq tárbıesi men el bolashaǵyna tikeleı jaýapty eń mańyzdy mamandyqtyń ıesi. Búgingi marapat — pedagogterdiń eńbegine kórsetilgen qurmettiń belgisi. Biz aldaǵy ýaqytta da ustazdardyń kásibı damýyna, bilim berý sapasyn arttyrýǵa jáne balalarǵa qolaıly orta qalyptastyrýǵa basymdyq beremiz. Osy baǵytta 2027 jyldan bastap oblystyq ádistemelik ortalyqtyń jumysy jańa formatqa kóship, «Ulytaý ustazy» oqý-ádistemelik ortalyǵy men Ustazdar úıin ashý josparlanyp otyr. Sonymen qatar pedagog kadrlarǵa suranysty eskere otyryp, joǵary kolledj mártebesin berý jáne «Logopedııa» baǵyty boıynsha qoldanbaly bakalavrıat baǵdarlamasyn iske qosý kózdelýde, — dedi oblys ákimi Eset Baıken.
Aldaǵy jyly balalardyń sporttyq, shyǵarmashylyq jáne áskerı-patrıottyq áleýetin damytýǵa baǵyttalǵan qosymsha bilim berý ortalyǵy ashylady. Sonymen qatar barlyq mektepte oqýshylardyń bos ýaqytyn tıimdi uıymdastyrýǵa arnalǵan Community ortalyqtaryn iske qosý josparlanýda.
Merekelik jıyn ustazdarǵa arnalǵan arnaıy kompozıtsııamen jáne estrada juldyzdarynyń kontserttik baǵdarlamasymen jalǵasty.
