Ulytaýda «Mereıli otbasy – 2025» oblystyq kezeńiniń jeńimpazdary marapattaldy
JEZQAZǴAN. KAZINFORM – Búgin Ulytaý oblysy qoǵamdyq damý basqarmasynyń uıymdastyrýymen «Mereıli otbasy – 2025» ulttyq konkýrsynyń oblystyq kezeńiniń jeńimpazdaryn marapattaý rásimi ótti. Sharaǵa oblys ákiminiń orynbasary Z.Aqylbekova, máslıhat depýtattary, ardagerler keńesi ókilderi qatysty.
Jyl saıyn dástúrli túrde ótetin respýblıkalyq «Mereıli otbasy» ulttyq konkýrsynyń oblystyq kezeńi óz máresine jetti. Bıyl baıqaýǵa oblys boıynsha 31 otbasy qatysyp, olardyń ishinen 5 otbasy oblystyq kezeńge joldama aldy. Bul – óńirimizde otbasy ınstıtýtynyń irgesi berik ekeniniń jáne baıqaýǵa degen qyzyǵýshylyqtyń arta túskeniniń aıǵaǵy.
«Mereıli otbasy» baıqaýynyń basty maqsaty – úlgili áýletterdiń ónegesin pash etý, otbasylyq qundylyqtardy, otbasy men nekeniń jaǵymdy úlgisin dáripteý, mártebesin arttyrý, sol arqyly qoǵamnyń irgetasyn nyǵaıtý. Halqymyz qashanda otbasyn Otannyń bir bólshegi dep bilgen. Atany asqar taýǵa, anany móldir bulaqqa, balany jasyl quraqqa teńep, otbasyndaǵy ózara súıispenshilik pen senim, jaýapkershilik pen qurmet sezimderine erekshe mán bergen.
Oblys ákiminiń orynbasary Z. Aqylbekova quttyqtaý sóz sóılep, búgingi baıqaýǵa qatysqan barlyq otbasylarǵa alǵys aıtyp, ár shańyraqqa shýaqty ǵumyr, taýsylmas baqyt tiledi.
Bıylǵy baıqaýda «Belsendi otbasy» nomınatsııasyn Jezqazǵan qalasynan Taevtar otbasy, «Úlgili otbasy» nomınatsııasyn Qarajal qalasynan Ospanovtar áýleti, «Ónerli otbasy» nomınatsııasyn Ulytaý aýdanynyń Esimseıitovter otbasy, «Berekeli shańyraq» nomınatsııasyn Sátbaev qalasynan Bekeshevter otbasy ıelendi. Al bas júlde – bir mıllıon teńge, Jańaarqa aýdanynyń Qapbasovtar áýletine buıyrdy.
Barlyq jeńimpazdar arnaıy dıplomdar men aqshalaı syılyqtarmen marapattaldy. Shara barysynda ónerpazdar án men bıden shashý shashyp, merekelik kóńil-kúı syılady.
«Mereıli otbasy» ulttyq baıqaýynyń respýblıkalyq kezeńinde Ulytaý oblysynyń namysyn Qapbasovtar áýleti qorǵaıtyn bolady.
Aıta keteıik, Ulytaý oblysynyń ákimi Jezqazǵan qalasyndaǵy aýlalardaǵy oıyn alańdarynyń jaı-kúıin tekserdi.