Ulytaýda kıikter qyrylyp jatyr
JEZQAZǴAN. KAZINFORM — Jezqazǵan men Qarajal qalasynyń mańynda úsh myńǵa jýyq kıiktiń óleksesi tabyldy. Tabıǵat qorǵaýshylar janýarlardyń neden qyrylǵanyn túsindirdi.
Ulytaý oblysynda kıikter jappaı qyrylyp jatqany jaıly áleýmettik jelide beınerolıkter jarııalandy.
Bul jaǵdaıǵa oraı oblys ákiminiń tapsyrmasyna sáıkes Jezqazǵan qalasy aýmaǵyn kıik óleksesinen tazartý júrgizilip jatyr.
Ákimdikte málim etkendeı, aqpan aıynan beri atqarylǵan jumystardyń nátıjesinde Jezqazǵan qalasynyń aýmaǵynda bas-aıaǵy 660-tan astam, al Qarajal qalasynyń aýmaǵynda 2342 kıik óleksesi tabylyp, joıyldy.
— Atalǵan jumystar barysynda Ulytaý oblysy boıynsha orman sharýashylyǵy jáne janýarlar dúnıesi aýmaqtyq ınspektsııa qyzmetkerleri, «Ohotzooprom» ınspektorlyq quramy, TJD jáne Jezqazǵan qalalyq ákimdiginiń qyzmetkerleri, Qarajal qalasynyń ákimdigi birlesken túrde ushalardy mal qorymyna tastady. Ol úshin Jezqazǵanda alty arnaıy tehnıka, Qarajal qalasynda arnaıy tehnıkalar men 11 top jumyldyrylǵan, — dep habarlady ákimdikte.
Ólekseler arnaıy mal qorymdaryna jetkizilip, joıyldy. Mamandardyń aıtýynsha, ólekselerdiń mehanıkalyq zaqymdary joq. Olardy joıý týraly komıssııa múshelerimen akt toltyrylyp, qol qoıyldy.
— Aıta keteıik, Keńgir sý qoımasyndaǵy muzdyń erýine baılanysty qaýipsizdik maqsatynda Tótenshe jaǵdaılar departamentiniń arnaıy jasaqtalǵan mamandarynan quralǵan bólimsheler jumyldyryldy. 2025 jylǵy qys aıynda tabıǵı jolmen jáne ıesiz ıtterge talanyp ólgen kıik ólekselerin jınaý jumysy áli de jalǵasyn tabady, — dep qosty ákimdikte.
Osyǵan deıin Ekologııa jáne tabıǵı resýrstar mınıstri Erlan Nysanbaev kıik sanyn qalaı retteıtinin aıtty.