Ulytaýda quldyqtaǵy balalarǵa emhana anyqtama berip kelgen – Oqıǵa nege 5 jyldan keıin anyqtaldy

ASTANA. KAZINFORM – QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova Ulytaýda 5 jyl boıy qulyqta bolǵan balalardyń qalaı anyqtalǵanyn aıtyp berdi.

«Ulytaý oblysyndaǵy balalardyń jaı-kúıi nege 5 jyldan keıin anyqtaldy? Qamqorshy organdar tekserý júrgizbedi me? Endi qandaı shara qoldanylady?», - dep suraq qoıdy tilshiler Ortalyq kommýnıkatsııalar qyzmetinde. 

Óz jaýabynda N. Ospanova qamqorshy organdar «Neke jáne otbasy» kodeksine sáıkes, jarty jyl saıyn tekserý júrgizilip turǵanyn aıtty. 

«2023 jyldyń qyrkúıeginde qamqorshylyq organdar alǵash kúdiktene bastady. Óıtkeni balalar kezek-kezek bir aptadan sabaqtan qalyp otyrǵan. Bul jaǵdaı qańtar aıyna deıin 4 aı boıy jalǵasqan. Eń qyzyǵy, emhana balalardyń aýyryp qalǵany týraly anyqtama berip otyrǵan», - dedi spıker. 

Qańtar aıynda Balalardyń quqyqtaryn qorǵaý komıteti balalar tárıbelenip jatqan barlyq otbasyny tekserip shyǵýǵa tapsyrma bergen. Osy tekserý aıasynda Ulytaý oblysynda quldyqta bolǵan balalar tabylǵan. 

«Qazir qylmystyq is júrip jatyr, tıisinshe, qamqorshylyq organyna, emhana, mektep jáne kolledj qyzmetkerlerine qatysty protsester tekserilýde. Árıne, asyrap alǵan ata-analar da jaýapkershilikten qutylmaıdy. Mundaı jaǵdaıda 111 telefonyna habarlasý kerek. Kez kelgen kúdikti jaıtty baıqasańyz, beıqam ótip ketpeńiz. Máselen, kórshiler, muǵalimder, ótip bara jatqan adamdar, týystar, dostar, qurbylar. Balaǵa qatysty árbir jaǵdaı týraly habarlaý óte mańyzdy», - dep qorytyndylady Nasymjan Ospanova.

Eske sala keteıik, 17 aqpanda Ulytaý oblysynda 5 jyl boıy fermada jumysqa jegilip, «quldyqta» bolǵan balalar qutqaryldy.

19 aqpanda kúdikti áıel ustaldy.