Ulytaýda «Kókmaısa» etnofestıvali bastalyp, bir mezette 500 bıe saýyldy
JEZQAZǴAN. KAZINFORM – Ulytaý oblysynyń Jańaarqa aýdanynda qazaq halqynyń baı murasy men ulttyq qundylyqtaryn dáripteıtin dástúrli «Kókmaısa – dalanyń tiri tarıhy» etnofestıvali bastaldy.
Óńirde ótken aýqymdy shara aıasynda 35 kıiz úı tigilip, festıvalge 15 myńǵa jýyq adam jınaldy. Іs-sharaǵa Ulytaý oblysynyń ákimi Dastan Ryspekov qatysyp, festıval alańyndaǵy kórme jáne etnoaımaqtardy aralady.
Festıvaldiń alǵashqy baǵdarlamasy kreatıvti aımaqpen tanysýdan bastalyp, odan keıin ulttyq taǵamdar men salt-dástúrler festıvaliniń saltanatty ashylý rásimi ótti.
«Kókmaısa – oblysymyzdyń brendine aınalǵan erekshe festıval. Bıyl ol on birinshi ret uıymdastyrylyp otyr. Osy ýaqytqa deıin bul ıgi dástúr Ulytaý aýdanynda ótkizilip kelse, bıyl alǵash ret Jańaarqa jerinde jalǵasyn tapty. Munda alys-jaqyn shetelderden qonaqtar qyzyǵýshylyq tanytyp arnaıy kelip otyr. Bul biz úshin úlken mártebe», – dedi Ulytaý oblysynyń ákimi Dastan Ryspekov.
Festıvaldiń eń áserli sátteriniń biri – bir mezette 500 bıeniń saýylýy boldy. Sonymen qatar qazaq halqynyń kóne «Qymyzmuryndyq» dástúri sahnalanyp, aýyl aqsaqaldary aq batasyn berdi. Qonaqtarǵa jańa saýylǵan qymyz usynylyp, ulttyq oıyndar men dástúrli óner kórsetilimderi uıymdastyryldy.
Budan keıin oblys ákimi elimizdiń ár óńirinen kelgen etnoaýyldardy aralap, kıiz úıler kórmesimen tanysty. Sondaı-aq ulttyq taǵamdardan dám tatyp, qolóner sheberleriniń buıymdaryn tamashalady.
Festıval aıasynda ulttyq sport túrlerinen de jarystar ótti. Qonaqtar kókpar, aýdaryspaq, qazaq kúresi, dástúrli sadaq atý, asyq atý, jilik syndyrý, qoshqar kóterý jáne arqan tartys sekildi ulttyq oıyndardy tamashalady.
Kúnniń ekinshi jartysynda ulttyq sport jeńimpazdary men quraq kórpe tigýdiń úzdik sheberlerin marapattaý rásimi ótedi.
Merekelik shara keshki gala-kontsertpen aıaqtalady. Sahnada qazaqstandyq estrada juldyzdary Ushqyn Jamalbek, Ózgeris Jerikbaı jáne JOSHY QAZAQ NATIONAL GROUP óner kórsetedi.
«Kókmaısa – dalanyń tiri tarıhy» etnofestıvali ulttyq salt-dástúrdi, taǵamdardy, qolónerdi jáne etnomádenı murany nasıhattaýmen qatar, Ulytaý óńiriniń týrıstik áleýetin tanytýǵa baǵyttalǵan mádenı jobalardyń biri sanalady.
