Ulytaýda qaıtarylǵan aktıvter qarjysyna jańa mektep salyndy
ASTANA. KAZINFORM — Bilim kúninde Ulytaý oblysy Jańaarqa aýdanynyń Manadyr aýylynda mekteptiń jańa ǵımaraty saltanatty túrde ashyldy, dep habarlaıdy oblystyq prokýratýranyń baspasóz qyzmeti.
Vedomstvonyń baspasóz qyzmeti atap ótkendeı, onyń qurylysyna zańsyz ıemdenilgen aktıvterdi memleketke qaıtarý esebinen qalyptastyrylǵan Arnaýly memlekettik qordan 1,2 mlrd teńgeden astam qarajat baǵyttaldy.
Saltanatty rásimge Ulytaý oblysynyń ákimi Eset Baıken, oblys prokýrory Jasulan Elamanov, pedagogter, ata-analar, oqýshylar, aýyl turǵyndary jáne buqaralyq aqparat quraldarynyń ókilderi qatysty.
— Jańa oqý jylyn jańa mektepte bastaý — balalarymyzdyń bolashaǵyna jasalǵan mańyzdy qadam. Arnaýly memlekettik qordyń qarajaty esebinen oblysta jalpy quny 20 mlrd teńgeden asatyn 17 áleýmettik mańyzy bar joba iske asyrylyp jatyr. Onyń 12-si aıaqtaldy. Manadyr mektebi — sol nysandardyń biri, — dedi oblys ákimi Eset Baıken.
Jańa ǵımarat zamanaýı talaptarǵa saı. Mektepte 18 oqý kabıneti, robototehnıka kabıneti jáne sport zaly jabdyqtalǵan. Aýmaqta basketbol jáne fýtbol alańdary salynǵan. Jasalǵan jaǵdaı aýyl balalarynyń sapaly bilim alyp, jan-jaqty damýyna múmkindik beredi.
— Zańsyz ıemdenilgen aktıvterdi qaıtarý bıýdjet qarajatyn tolyqtyrýmen ǵana shektelmeıdi. Onyń túpki maqsaty — qaıtarylǵan qarajatty halyqtyń ıgiligine jáne eldiń damýyna baǵyttaý. Búgin biz onyń naqty nátıjesin kórip otyrmyz: bul qarajat balalardyń bilimi men bolashaǵyna qyzmet etetin mektep bolyp elge qaıtaryldy. Bul — zań ústemdigi men áleýmettik ádilettilik qaǵıdattarynyń is júzindegi kórinisi, — dep atap ótti oblys prokýrory Jasulan Elamanov.
Jalpy, Jańaarqa aýdanynda qaıtarylǵan aktıvter esebinen bilim berý, densaýlyq saqtaý jáne sýmen jabdyqtaý salalarynda alty joba iske asyryldy. Olardyń paıdalanýǵa berilýi aýdannyń áleýmettik ınfraqurylymyn damytýǵa jáne halyqtyń ómir súrý sapasyn arttyrýǵa yqpal etedi.
Osyǵan deıin Astanada zańsyz aktıvter esebinen 12 bilim berý nysanyna qansha qarajat bólingenin jazǵanbyz.
