Ulytaýda esirtki jarnamasy bar 2 600-den astam ınternet-resýrs buǵattaldy
ASTANA. KAZINFORM — Ulytaý oblysynda «Kıbernadzor» júıesi arqyly esirtkini taratýǵa qatysty tyıym salynǵan aqparat jarııalanǵan 2 631 ınternet-resýrs anyqtalyp, olarǵa qoljetimdilik shekteldi. Sondaı-aq esirtkiniń zańsyz aınalymyna qatysy bar úsh toptyń joly kesilip, 388 keliden astam esirtki tárkilendi, dep habarlaıdy Polisia.kz.
Esirtkiniń taralý joldary ártúrli. Zańsyz zattar óńirge syrttan jetkizilip qana qoımaı, ınternet arqyly da nasıhattalyp, turǵyn úılerdiń qabyrǵalary men qoǵamdyq oryndarda jarnamalanýy múmkin. Sondyqtan oǵan qarsy kúres naqty jetkizý arnalaryna tosqaýyl qoıýmen qatar, zańsyz aqparatty anyqtaý men joıýdy da qamtıdy.
Bul jumysqa polıtsııa qyzmetkerlerimen birge eriktiler de atsalysyp júr. Olar aýlalardy, aıaldamalardy jáne ǵımarattardyń qasbetterin aralap, esirtki jarnamasy bar jazýlardy anyqtap, olardy joıýǵa qatysady. Ótkizilgen 11 aktsııa barysynda osyndaı 125-ke jýyq jazý men graffıtı óshirildi.
Jalpy, eriktilermen birlesip 32 profılaktıkalyq is-shara uıymdastyrylyp, oǵan 120-ǵa jýyq adam qatysty. Olardyń jumysy qoǵamdyq oryndardaǵy zańsyz jarnamany joıýmen ǵana shektelmeıdi. Bul — turǵyndardyń ortaq qaýipsizdikke jaýapkershilikpen qarap, esirtkiniń taralýyna qarsy kúreske úles qosýynyń naqty kórinisi.
Óńirdegi profılaktıkalyq jumystar 45 myńnan astam adamdy qamtydy. Osy baǵytta barlyǵy 908 is-shara ótkizildi. Onyń ishinde mektepterde, kolledjder men joǵary oqý oryndarynda 300-ge jýyq kezdesý men túsindirý jumysy uıymdastyryldy. Jastarǵa esirtkiniń zııany, zańsyz aınalymǵa qatysýdyń quqyqtyq saldary túsindirildi. Іs-sharalarǵa bilim berý jáne densaýlyq saqtaý uıymdarynyń, sondaı-aq qoǵamdyq birlestikterdiń ókilderi de tartyldy.
Profılaktıkalyq jumystar reıdtik is-sharalarmen de tolyqtyrylyp keledi. Juma jáne senbi kúnderi polıtsııa qyzmetkerleri múddeli organdardyń ókilderimen, keńes múshelerimen jáne eriktilermen birlesip, oıyn-saýyq oryndary men kompıýterlik klýbtardy tekseredi. Eseptik kezeńde júzden astam reıd ótkizildi. Tekserý barysynda túngi ýaqytta zańdy ókilderinsiz júrgen kámeletke tolmaǵandarǵa jáne olardyń quqyqqa qaıshy áreketterge tartylý qaýpine erekshe nazar aýdarylady.
Esirtkiniń zańsyz jetkizilý arnalaryna tosqaýyl qoıý baǵytynda da birqatar nátıjege qol jetkizildi. Naýryz aıynda ońtústik óńirden kelgen bes adamnan turatyn top ustalyp, olardan 302 keliden astam esirtki tárkilendi. Qaraǵandydan Ulytaý oblysyna sıntetıkalyq esirtki jetkizý arnasynyń joly kesilip, 1,5 keli sıntetıkalyq zat alyndy. Al tamyz aıynda ustalǵan taǵy bir toptan 40 kelige jýyq marıhýana tárkilendi. Jalpy, eseptik kezeńde oblysta esirtkige qatysty 63 quqyq buzýshylyq tirkeldi.
Buǵattalǵan ınternet-resýrstar, joıylǵan jarnamalyq jazýlar men tárkilengen esirtki — atqarylǵan jumystyń naqty nátıjeleri. Alaıda basty maqsat — zańsyz aınalymǵa tosqaýyl qoıýmen qatar, ásirese jastardyń esirtkige áýestenýiniń aldyn alý. Bul baǵyttaǵy jumys polıtsııa qyzmetkerleriniń, memlekettik organdardyń, qoǵamdyq uıymdardyń jáne beıjaı qaramaıtyn azamattardyń birlesken kúsh-jigerimen jalǵasyp keledi.
Aıta keteıik, Shymkentte esirtkige qatysty oqıǵadan keıin polıtseı jumystan shyǵaryldy.
