Ulytaýda energetıka nysandarynyń jylytý maýsymyna daıyndyǵy tekserildi

Jylytý maýsymyna daıyndyq barysyn baqylaý aıasynda Energetıka mınıstrligi Memlekettik energetıkalyq qadaǵalaý jáne baqylaý komıteti tóraǵasynyń orynbasary Ernar Hasenov Jezqazǵan jáne Sátbaev qalalaryndaǵy energetıkalyq nysandardy aralady.

Jezqazǵan JEO-da tórt qazandyqqa aǵymdaǵy jóndeý, bir qazandyqqa kúrdeli jóndeý jáne tórt týrboagregatqa aǵymdaǵy jóndeý jumystary aıaqtaldy. Qazirgi ýaqytta taǵy eki qazandyqta aǵymdaǵy jáne kúrdeli jóndeý jumystary júrgizilýde.

№1 jylý stantsııasynda eki qazandyqqa aǵymdaǵy jóndeý jumystary aıaqtaldy, taǵy eki qazandyqta jumystar jalǵasyp jatyr. Sondaı-aq gaz júretin traktini kúrdeli jóndeý jumystary aıaqtalýǵa jaqyn.

Jylytý maýsymyn josparly bastaý úshin qajetti jabdyqtar bar. Otynnyń normatıvtik qory qamtamasyz etilip, paıdalaný personalymen avarııaǵa qarsy jattyǵýlar ótkizilgen.

Sátbaev jáne Jezqazǵan qalalaryndaǵy jylý jelilerinde jumys jalǵasyp jatyr. Sátbaevta uzyndyǵy 0,3 km jylý jelisi ýchaskesin qaıta jańǵyrtý jáne jalpy uzyndyǵy 0,87 km ýchaskelerge kúrdeli jóndeý jumystary aıaqtaldy. №1 magıstraldyq jeli boıynsha 1,55 km-diń 1,5 km ýchaskesinde, oramishilik jeliler boıynsha 24 km-diń 21 km ýchaskesinde jumystar oryndaldy.

Jezqazǵan qalasynda 10,9 km jylý jelisine jóndeý júrgizildi. Qalǵan jumystardy jylytý maýsymy bastalǵanǵa deıin aıaqtap, odan keıin jelilerdi gıdravlıkalyq synaqtan ótkizý josparlanyp otyr.

Oblystyń elektr jelileri kesheni boıynsha 2026 jylǵa josparlanǵan elektr jelileri men jabdyqtaryna kúrdeli jóndeý kólemderi oryndaldy. Atap aıtqanda, 1388 km elektr berý jelisi jáne 15 qosalqy stantsııa jóndeldi.

Tekserý qorytyndysy boıynsha qalǵan jumystardy ýaqtyly aıaqtaýǵa jáne kúzgi-qysqy kezeńde energetıkalyq ınfraqurylym nysandarynyń senimdi jumysyn qamtamasyz etýge erekshe nazar aýdaryldy.

Aıta ketelik Petropavlda 80-nen astam kópqabatty úı jylytý maýsymyna áli daıyn emes ekenin jazǵan edik.