Ulytaýda bilim basqarmasynyń basshysy 8 jylǵa sottaldy

JEZQAZǴAN. KAZINFORM — Jezqazǵan qalalyq soty bıýdjet qarjysyn asa iri kólemde jymqyrý isi boıynsha úkim shyǵardy. Aıyptalýshylar qatarynda Ulytaý oblysy bilim basqarmasynyń basshysy, onyń orynbasary jáne bas býhgalter.

Sot materıaldaryna sáıkes, 2022–2023 jyldary basqarma basshysy qyzmettik ókiletin paıdalanyp, eki adamdy jalǵan túrde jumysqa qabyldap, olarǵa zańsyz jalaqy taǵaıyndaǵan. Budan bólek, ol óz orynbasarymen jáne býhgalterimen birge bıýdjet qarajatyn syıaqy retinde zańsyz bólip otyrǵan. Syıaqynyń bir bóligi basqarma basshysynyń ózine jáne basqa da aıyptalýshylarǵa berilgen.

Bas býhgalter is júzinde bolmaǵan issaparlar men turǵyn úı jaldaý shyǵyndaryna tólem rásimdegen. Basshynyń orynbasary da negizsiz qarajat alǵan. Memleketke kelgen zalaldyń jalpy kólemi — 93,2 mıllıon teńge.

Aıyptalýshylardyń biri kinásin tolyq moıyndamasa, ekinshisi tek ishinara keliskenine qaramastan, sottaǵy aıǵaqtar olardyń kinásin dáleldedi. Nátıjesinde basqarma basshysy men orynbasary segiz jylǵa bas bostandyǵynan aıyrylyp, memlekettik qyzmette ómir boıy laýazym ıelený quqyǵynan aıyryldy. Olar sot zalynda qamaýǵa alyndy.

Bas býhgalter de kináli dep tanyldy, alaıda onyń qaıtys bolýyna baılanysty is toqtatyldy.

Úkim zańdy kúshine engen joq.

Aıta keteıik, buǵan deıin Qaraǵandydaǵy Kostenko shahtasyndaǵy jarylys isi boıynsha aıyptalǵan 10 adamǵa 5 jyldan 8 jylǵa deıin bas bostandyǵynan aıyrý jazasy taǵaıyndalǵan bolatyn.