Ulytaýda aýyl sharýashylyǵy basqarmasy eks-basshysy men orynbasaryna qatysty tergeý bastaldy
ASTANA. KAZINFORM — Bul aqparatty QR Sybaılas jemqorlyqqa qarsy is-qımyl agenttigi rastady, dep habarlaıdy Kazinform tilshisi Antıkor baspasóz qyzmetine silteme jasap.
— Sybaılas jemqorlyqqa qarsy qyzmet jemqorlyq deregine kúdikti Ulytaý oblysy aýyl sharýashylyǵy jáne jer qatynastary basqarmasynyń burynǵy basshysy men onyń orynbasaryna qatysty tergeý bastalǵanyn rastaıdy. Tergeý jalǵasyp jatyr. QR Qylmystyq-protsestik kodekstiń 201-babyna sáıkes ózge aqparat jarııa etilmeıdi, — dep atap ótti vedomstvo.
Osyǵan deıin áleýmettik jelilerde Qaırat Mýtaev pen Aqbaıan Seksenbaeva tártiptik jazasy bola tura qol astyndaǵy qyzmetkerleri arqyly syılyqaqy alǵany týraly aqparat taraldy.
Eske salsaq, Qaırat Mýtaev 2022-2024 jyldar aralyǵynda Ulytaý oblysy aýyl sharýashylyǵy jáne jer qatynastary basqarmasynyń basshysy qyzmetin atqarǵan. Al 2024 jylǵy 2 jeltoqsanda Qyzylorda oblysy aýyl sharýashylyǵy jáne jer qatynastary basqarmasy basshysynyń orynbasary bolyp taǵaıyndalǵan.
Buǵan deıin Taldyqorǵan qalalyq soty «Jetisý» fýtbol klýby» KMQK dırektory K. Donsebaevqa qatysty úkim shyǵarǵanyn jazdyq.