Ulytaýda anyqtalǵan zymyran bólikteri turǵyndar úshin qaýipti me

ASTANA. KAZINFORM — Baıqońyrdan jańa pılottyq kemeniń ushyrylymy sátti júzege asty. Degenmen Ulytaý óńirine zymyran bólikteri qulaǵan. Mamandar «Soıýz MS-28» qaldyqtarynan ekologııaǵa zııan keltirilmegenin aıtty.

Jasandy ıntellekt jáne tsıfrlyq damý mınıstrligi baspasóz qyzmetiniń málimetinshe, 2025 jyldyń 27 qarashasynda «Baıqońyr» ǵarysh aılaǵynan Astana ýaqytymen 14:27–de «Soıýz MS-28» pılottyq kemesi bar zymyran-tasyǵysh sátti ushyryldy. Zymyrannyń ushyrylýy shtattyq rejımde ótti.

— Zymyrannyń birinshi satysy Ulytaý oblysyndaǵy eldi mekenderden qashyqtaǵy arnaıy belgilengen aımaqqa qulady. Halyq úshin qandaı da bir qaýip joq. Oqıǵa ornynda «Roskosmos» mamandary, sondaı-aq Qazaqstan men Reseı ekologteri jumys júrgizip jatyr. Ólsheýler men synamalar alynady. Aldyn ala málimetter boıynsha, ekologııaǵa zııan keltirilmegen, — delingen mınıstrlik taratqan aqparatta.

Vedomstvo atap ótkendeı, «Soıýz MS-28» ekologııalyq turǵydan qaýipsiz otyn — kerosın men suıyq ottegin paıdalanady. Qulaǵan bólshekter radıatsııalyq, hımııalyq nemese bıologııalyq qaýip týdyrmaıdy.

Eske salsaq, Memleket basshysy «2004 jylǵy 22 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý týraly hattamany ratıfıkatsııalaý týraly» Qazaqstan Respýblıkasynyń Zańyna qol qoıdy.