Ulytaýda alkogol satý tártibin buzǵan 82 kásipker jaýapqa tartyldy
ASTANA. KAZINFORM – Ulytaý oblysynda jyl basynan beri alkogol ónimderin satý tártibin buzǵan 82 kásipkerlik sýbektisi ákimshilik jaýaptylyqqa tartyldy. Sot sheshimimen 54 saýda nysanynyń lıtsenzııasy toqtatyldy nemese olar lıtsenzııasynan aıyryldy.
Ulytaý oblystyq prokýratýrasy baspasóz qyzmetiniń habarlaýynsha, bul jumystar «Aıqyn Nátıje» jobasy aıasynda júrgizilip jatyr. Oblys prokýratýrasy polıtsııa organdarymen birlesip, alkogol ónimderin zańsyz satýdyń aldyn alý, qoǵamdyq tártipti nyǵaıtý jáne quqyq buzýshylyqtar deńgeıin tómendetý baǵytynda profılaktıkalyq sharalar qabyldaý ústinde.
Tekserý nátıjesinde 13 kásipkerdiń alkogol ónimderin 21 jasqa tolmaǵandarǵa satqandyǵy anyqtaldy. Taǵy 69 kásipker alkogoldi zańda belgilengen ýaqyttan tys ýaqytta saýdalaǵan.
- Sonymen qatar oblysta alkogol ónimderin satýdan jáne tutynýdan óz erkimen bas tartý tájirıbesi engizilip jatyr. Qazir mundaı mártebe óńirdegi 27 aýyldyq eldi mekende qalyptasqan. Bul bastama qaýipsiz áleýmettik ortany qalyptastyrýǵa jáne qoǵamdyq tártipti nyǵaıtýǵa baǵyttalǵan, - delingen habarlamada.
Prokýratýra men polıtsııa qyzmetkerleri alkogol ónimderin zańsyz satý derekterin anyqtaý úshin birlesken reıdterdi turaqty túrde ótkizip keledi.
Oblys prokýratýrasy zańsyz saýda faktilerin, sonyń ishinde qaıtalanǵan quqyq buzýshylyqtardy anyqtaý jáne jolyn kesý jumystaryn jalǵastyrady.
Al Temirtaýda zańsyz saýda ornynan 300 lıtrden astam alkogol tárkilendi.
