Ulytaýda 7 myń ga aýyl sharýashylyǵy jeri maqsatsyz paıdalanylǵany anyqtaldy
JEZQAZǴAN. KAZINFORM – Ulytaý oblysynyń prokýratýrasy jer zańnamasynyń oryndalýyn tekserý barysynda jer ýchaskelerin zańsyz berý jáne olardy maqsatsyz paıdalaný faktilerin anyqtady.
Tekserý nátıjesinde kommertsııalyq maqsattaǵy eki jer ýchaskesi belgilengen tártip saqtalmaı berilgeni, sondaı-aq aýyl sharýashylyǵy úshin bólingen 7 myń gektar jerdiń maqsatsyz paıdalanylǵany anyqtaldy.
Jańaarqa aýdanynda aýdany 1,2 gektardan asatyn jer ýchaskesi mindetti elektrondyq saýda-sattyq ótkizilmeı jeke tulǵaǵa berilgen. Bul jaǵdaı ashyqtyq qaǵıdattaryn buzyp, negizsiz artyqshylyq týǵyzǵan.
Sonymen qatar sý qorǵaý aımaqtarynda jer berýge tyıym salatyn sý zańnamasynyń talaptary buzylyp, 55 jer ýchaskesi jeke menshikke berilgeni belgili boldy.
Anyqtalǵan buzýshylyqtar boıynsha prokýrorlyq qadaǵalaý aktileri engizildi. Qazirgi ýaqytta zańsyz berilgen jer ýchaskelerin memlekettik menshikke qaıtarý jáne kináli tulǵalardy jaýapqa tartý boıynsha sharalar qabyldanyp jatyr.
Aıta keteıik, bul baǵyttaǵy jumys jalǵasyn tabady.
Eske salsaq, osyǵan deıin Atyraýda 5,1 myń gektar jer memleketke qaıtarylǵanyn jazǵanbyz.
