Ulytaýda 2,4 mlrd teńgege jańa sport kesheni salynady
JEZQAZǴAN. KAZINFORM – Ulytaý oblysynyń Jáırem kentinde «Qazaqstan halqyna» qoǵamdyq qorynyń qoldaýymen quny 2,4 mlrd teńge bolatyn jańa deneshynyqtyrý-saýyqtyrý kesheni salynady, dep habarlaıdy Ulytaý oblysy ákimdiginiń baspasóz qyzmeti.
Másele Ulytaý oblysynyń ákimi Dastan Ryspekovtiń qatysýymen ótken «Qazaqstan halqyna» qoǵamdyq qory Qamqorshylyq keńesiniń otyrysynda qaraldy. Jıynda óńirdegi bilim berý salasyn damytýǵa arnalǵan «QH «Bilim-Innovatsııa» lıtseıleriniń tájirıbesin Ulytaý oblysynyń mektepterine engizý» qaıyrymdylyq jobasy da talqylandy.
– Bul joba óńirimizdegi sapaly bilimge qoljetimdilikti arttyrýǵa, pedagogterdiń kásibı áleýetin nyǵaıtýǵa jáne oqýshylardyń bilim deńgeıin kóterýge keń múmkindik beredi. Biz óz tarapymyzdan mektepterdiń materıaldyq-tehnıkalyq bazasyn jaqsartyp, jóndeý jumystaryn júrgizip kelemiz. Osyndaı keshendi jumystardyń nátıjesinde qala men aýyl mektepteriniń damý múmkindigi artyp, óńirdegi bilim sapasy jańa deńgeıge kóteriledi dep senemiz. Sondyqtan bul tájirıbeni oblys mektepterine engizýge tolyq qoldaý bildiremiz, – dedi Ulytaý oblysynyń ákimi Dastan Ryspekov.
Keńes qorytyndysy boıynsha Jáırem kentinde jańa deneshynyqtyrý-saýyqtyrý keshenin salý týraly kelisimge qol jetkizildi. Jobanyń jalpy quny shamamen 2,4 mlrd teńgeni quraıdy. Onyń 1,7 mlrd teńgesin «Qazaqstan halqyna» qoǵamdyq qory qarjylandyrsa, qalǵan bóligi jergilikti bıýdjet esebinen júzege asyrylady.
Jalpy aýmaǵy 3 250 sharshy metr bolatyn zamanaýı sport kesheni 6–18 jas aralyǵyndaǵy 600 bala men jasóspirimniń turaqty sportpen aınalysýyna múmkindik beredi. Nysan paıdalanýǵa berilgennen keıin 45 jańa jumys orny ashylady.
– «Qazaqstan halqyna» qoǵamdyq qorynyń óńirdegi áleýmettik mańyzy bar bastamalardy júzege asyrýǵa kórsetip otyrǵan turaqty qoldaýyna alǵys bildiremiz. Bul jobalar turǵyndardyń ómir sapasyn arttyrýǵa jáne óńirdiń áleýmettik ınfraqurylymyn damytýǵa zor úles qosady, – dedi óńir basshysy.
