Ulytaýda 1,5 jyl boıy ilgeri jyljý baıqalmaıdy - depýtat
ASTANA. KAZINFORM – «Aýyl» fraktsııasynyń depýtattary jańadan qurylǵan Ulytaý oblysynyń túıtkildi máseleleri boıynsha Premer-Mınıstrge saýal joldady.
«Prezıdenttiń 2022 jyldyń maýsymyndaǵy Qazaqstanda jańa úsh oblys qurý jónindegi jarlyǵyn súıinshilep habarlaǵanymyz bárimizdiń esimizde shyǵar. Sol kezde Memleket basshysy Ulytaý oblysynyń áleýmettik-ekonomıkalyq damýyna qatysty Úkimet pen aımaq jetekshilerine naqty tapsyrmalar bergen bolatyn. Ókinishke oraı, Ulytaý oblysy turǵyndarymen kezdeskenimizde sol jańalyqty estigen ulytaýlyqtardyń qýanyshy bul kúnde narazylyqqa ulasqanyn, al berilgen ýádeniń oryndalmaýy halyqtyń bılikke senimsizdik týdyrǵanyn kóz kórdi», - dedi depýtat Qaraqat Ábden.
Onyń aıtýynsha, ulytaýlyqtar oblystaǵy jol qurylysynyń aıaqtalýyn, zamanaýı áleýmettik ınfraqurylym nysandary salynýyn (aýrýhana, mektep, teatr jáne JOO) jáne jańa baspanalardy kóbeıtip, aımaqty kógildir otynmen qamtamasyz etýdi kútti.
«Alaıda, 1,5 jyl boıy óńirdiń áleýmettik-ekonomıkalyq damýynda bolýy tıis ilgeri jyljý baıqalmaıdy. Máselen Jezqazǵan-Qyzylorda tasjolyn tóseý uzaqqa sozylyp ketti. Eýrazııa kindigi sanalatyn elimizdiń qaq ortasynda ornalasqan Ulytaý – áli kúnge deıin «qıyr-qııan» aımaq bolyp otyr. Oǵan bir sebep, bálkim, basty sebep, jobalyq-smetalyq qujattamanyń ýaqytyly jasalmaýy», - deıdi Q. Ábden.
Sondaı-aq bólingen bıýdjettiń jetispeýshiliginen jáne jobalardyń qymbattaýynan birqatar mańyzdy is-sharalar júzege aspaı otyr. Mysaly, qalaishilik sý qubyrlary júıesin, sharýashylyq jáne aýyz sýdy tazartý ǵımarattaryn qalpyna keltirý, jylý júıelerin jandandyrý jumystary bar.
Úshinshiden, jergilikti bıýdjet kóleminiń azdyǵy jáne jańa bastamalardy júzege asyrý boıynsha bıýdjettik ótinimderdiń bolmaýy óńir úshin óte mańyzdy jobalardy bastaýǵa qolbaılaý bolyp otyr.
«Jobalyq-smetalyq qujattamalardyń kóbi respýblıkalyq bıýdjetti bekitýden keıin shyqqan. Demek, atalǵan jobalardy iske asyrý úshin jańa bıýdjettik kezeńdi kútý kerek. Oblys halqy mańyzdy, tipti óte mańyzdy máseleler legin alǵa tartyp otyr. Mysaly, óńirde veterınarlyq zerthana joq. Esterińizge sala keteıin, bul – elimizdegi aýylsharýashylyǵy, onyń ishinde, mal shaýrashylyǵyn damytyp otyrǵan birden-bir óńir. Sol malshylar, tórt túliginiń aýrýyn anyqtaýy úshin onyń synamasyn 500 shaqyrym jerdegi Qaraǵandyǵa, ne odan ári jatqan Astanaǵa aparýǵa májbúr», - deıdi depýtat.
Jańa oblystyń qurylýy turǵyndar tyǵyzdyǵy koeffıtsıentiniń 40%-ǵa deıin tómendeýine ákeldi. Bul oblys ortalyǵynyń medıtsınalyq uıymdaryn qarjylandyrý máselesine tikeleı yqpal etti.
«Saıyp kelgende, halyq memlekettik júıedegi protsedýralyq is-áreketterdi nemese túıtkildi máselelerdi túsinýge esh mindetti emes. Olar úshin basty ustanym – Prezıdent pen onyń «óńirdi kóterý, azamattardyń ál-aýqatyn jaqsartý kerek» degen ýádesi. Qurmetti Álıhan Ashanuly! Osy ózekti máselelerdi sheshýdiń birqatar naqty usynystaryn ózińizge joldaımyz», - dedi Q. Ábden.
Fraktsııa depýtattary Qyzylorda-Jezqazǵan tas joly jobasyn júzege asyrýdy jedel arada qolǵa alýdy, óńirde bastalǵan jáne júzege asýy tıis jańa jobalardy qarjylandyrýǵa arnaıy qarajat bólýdi, oblysta Veterınarlyq zerthana ashýdy, Ulytaý oblysynyń 2022-2026 jyldarǵa arnalǵan áleýemttik-ekonomıkalyq damý josparynyń iske asýynyń qazirgi saraptamasyn qolǵa alýdy usyndy.
