Ulytaý turǵyny úı jóndeý kezinde tarıhı myltyq taýyp aldy
ASTANA. KAZINFORM — Ulytaý oblysynyń turǵyny sırek kezdesetin kóne qarýdy polıtsııaǵa tapsyrdy, dep habarlaıdy Polisia.kz.
Ulytaý oblysy Jańaarqa aýdanynyń polıtsııa bólimine jergilikti turǵyn habarlasyp, satyp alǵan eski úıine jóndeý jumystaryn júrgizý barysynda kóne myltyq taýyp alǵanyn habarlady. Eń bastysy — azamat zań talaptaryn saqtap, qaýipti zatty dereý polıtsııa qyzmetkerlerine tapsyrǵan. Tekserý barysynda tabylǵan buıymnyń jaı ǵana qarý emes ekeni anyqtaldy.
— Ol — álemdik qarý-jaraq tarıhynda erekshe orny bar, áıgili konstrýktor Djon Mozes Braýnıng jasaǵan Browning Auto-5 tegis uńǵyly jartylaı avtomatty myltyǵy bolyp shyqty. Atalǵan model 1898 jyly qurastyrylyp, 1905 jyldan bastap áskerı qurylymdar men quqyq qorǵaý organdarynyń qoldanysyna engizilgen. Sonymen qatar bul qarý Ekinshi dúnıejúzilik soǵys kezinde de keńinen paıdalanylǵan. Qazir tabylǵan qarýǵa qatysty ballıstıkalyq saraptamalar taǵaıyndaldy, — deıdi tártip saqshylary.
Mamandar onyń naqty shyǵarylǵan ýaqytyn jáne qandaı da bir quqyq buzýshylyqtarǵa qatysynyń bar-joǵyn anyqtap jatyr.
Polıtsııa qyzmetkerleri qarýdy óz erkimen tapsyrǵan aýdan turǵynyna alǵys bildirdi. Tártip saqshylarynyń aıtýynsha, bul áreket azamattyń jeke qaýipsizdikke ǵana emes, qoǵam tynyshtyǵyna da beıjaı qaramaıtynyn kórsetedi.
Eske salaıyq, zańsyz saqtalǵan qarý-jaraqtardy, oq-dáriler men jarylǵysh zattardy óz erkimen polıtsııaǵa tapsyrǵan azamattar, eger olardyń áreketterinde ózge quqyq buzýshylyq belgileri bolmasa, qylmystyq jáne ákimshilik jaýapkershilikten bosatylady. Keıde eski úıler ótkenniń esteligin ǵana emes, tarıhı qupııalaryn da saqtap jatady. Osyǵan baılanysty tártip saqshylary turǵyndardy qyraǵylyq tanytyp, kúmándi zattar tabylǵan jaǵdaıda birden «102» arnasyna habarlasýǵa shaqyrady.
Budan buryn azaq batyrlary qandaı qarý-jaraq qoldanǵan
https://kaz.inform.kz/news/kazak-batirlari-kanday-karu-zharak-koldangan-4b828ee2
