Ulytaý turǵyndaryna joǵary tehnologııalyq kardıohırýrgııalyq kómek qoljetimdi boldy
JEZQAZǴAN. KAZINFORM – Ulytaý oblysynda alǵash ret 5 patsıentke kardıoverter-defıbrıllıatordy ımplantattaý boıynsha joǵary tehnologııalyq operatsııa jasaldy. Bul ota júrektiń kenetten toqtap qalmaýyna baǵyttalǵan jáne Ulytaý óńiriniń turǵyndaryna MÁMS júıesi sheńberinde múldem tegin oryndaldy.
Buǵan deıin mundaı qyzmetterdi alý úshin patsıentter Astana, Almaty jáne basqa da iri qalalardyń medıtsınalyq ortalyqtaryna barýǵa májbúr bolǵan. Endi kardıohırýrgııalyq kómek jergilikti jerde de bar. Bul emdeýdegi shyǵyndar men kútý ýaqytyn qysqartady.
Aldaǵy ýaqytta osy baǵytty keńeıtý josparlanyp otyr. Atap aıtqanda, osyǵan uqsas operatsııalar MÁMS júıesi sheńberinde oryndalady jáne Ulytaý óńiriniń árbir saqtandyrylǵan patsıentine qoljetimdi bolady.
Operatsııalar QR Densaýlyq saqtaý mınıstrliginiń, Áleýmettik medıtsınalyq saqtandyrý qorynyń jáne «Qazaqmys» korporatsııasynyń qoldaýymen «Jezqazǵan» medıtsınalyq ortalyǵynyń bazasynda júrgizildi.
Joba kýratory – UMC Heart Center ınterventsııalyq arıtmologııa bólimshesiniń meńgerýshisi Ómirbek Nuralınov.
Tamyz aıynda Densaýlyq saqtaý mınıstriniń Ulytaý óńirine jumys sapary sheńberinde bizdiń ǵylymı ortalyqtarymyzdyń basshylarymen, UMC klınıkalarymen, «Jezqazǵan» medıtsınalyq ortalyǵynyń dárigerlerimen, medıtsınalyq saqtandyrý qorynyń mamandarymen jergilikti turǵyndar úshin joǵary tehnologııalyq medıtsınalyq kómektiń qoljetimdiligin jaqsartý máseleleri talqylandy.
Ulytaýǵa jumys saparynan keıin óńirdiń medıtsınalyq uıymdary qyzmetiniń jumysyna keshendi taldaý júrgizildi, júıeli problemalar anyqtaldy jáne olardy kezeń-kezeńimen sheshý boıynsha sharalar usynyldy.
Bıyl qyrkúıek aıynda Ulytaý oblysynyń densaýlyq saqtaý júıesin damytýdyń Keshendi jospary bekitildi. Qujattyń basty maqsaty – óńir turǵyndaryna sapaly jáne ýaqtyly medıtsınalyq kómek kórsetý úshin jaǵdaı jasaý.
Ol úshin medıtsınalyq nysandardy salý jáne kúrdeli jóndeý, olardy zamanaýı jabdyqtarmen jaraqtandyrý, dárilik zattarmen qamtamasyz etý, sondaı-aq medıtsınalyq kadrlardy daıarlaý jáne tartý jónindegi sharalar kózdelgen.