Ulytaý tehnıkalyq ýnıversıtetiniń túlekteri Qazaqstan men AQSh dıplomdaryn alyp shyǵady
JEZQAZǴAN. KAZINFORM — Prezıdent tapsyrmasyna sáıkes Ulytaý tehnıkalyq ýnıversıtetin ashý úshin aýqymdy jumys bastaldy. Bul týraly oblys ákimi Dastan Ryspekov eseptik baıandamasynda aıtty.
Ákimniń baıandaýynsha, jaqynda Ǵylym jáne joǵary bilim mınıstrligi men «Qazaqmys» korporatsııasy arasynda memorandým jasaldy.
— Jańa ýnıversıtet bilim, ǵylym, ónerkásip bir arnaǵa toǵysqan alańǵa aınalady jáne Ulytaý oblysynyń ekonomıkalyq, áleýmettik áleýetin kúsheıtýge yqpal etedi. Ýnıversıtet túlekteri qazaqstandyq jáne AQSh (Colorado School of Mines) dıplomyna ıe bolady, — dedi Dastan Ryspekov elordada Ortalyq kommýnıkatsııalar qyzmetinde.
Bıyl Ulytaý oblysynda áleýmettik ınfraqurylymdy damytý aıasynda birqatar mańyzdy joba júzege asyryldy. Atap aıtqanda, 380 oryndyq eki mektep pen 805 orynǵa arnalǵan úsh balabaqsha paıdalanýǵa berildi.
Óńirde alǵash ret aýtızmi bar balalardy qoldaý ortalyǵy ashyldy. 7 mektep jóndelip, 28 pándik kabınet satyp alyndy.
— Osy jyly Qarajal qalasy men Myńadyr stantsııasynda 2,6 mlrd teńgege eki mekteptiń qurylysy aıaqtalǵaly jatyr, Jezqazǵan men Sátpaevta eki jańa balabaqsha salý josparlanyp otyr. Demeýshilik qarajat esebinen Oqýshylar saraıynyń qurylysy bastaldy, — dedi Dastan Ryspekov.
2026-2027 jyldary Jezqazǵanda 1200 oryndyq BINOM mektebiniń qurylysy, 400 ul balaǵa jáne 400 qyz balaǵa arnalǵan «BІLІM INNOVATsIıA» mamandandyrylǵan lıtseıi men 2 ınternat-jataqhanasyn salý josparlanyp otyr.
— Bıyl respýblıkalyq «Úzdik 100 mektep» qataryna oblys boıynsha 3 mektep qosyldy. 2024-2025 oqý jylynda oblystyń bilim sapasy 59,1% bolsa, bıyl 61,7% nátıjesimen respýblıka boıynsha 6-shy oryndy ıelendi. 2025 jyly «Altyn belgi» belgisiniń ıegerleri 2 ese ósip, 74 túlekke jetti. «Úzdik pedagog» respýblıkalyq baıqaýynda oblystyń 4 pedagogy jeńimpaz atanyp, oblysymyz úzdik úshtik qatarynan kórindi, — deıdi spıker.
Buǵan deıin oblys ákimi Ulytaý oblysynda ortasha jalaqy 7,5%-ǵa óskenin aıtqan edi.
Sondaı-aq, Ulytaý oblysynyń bıýdjeti 30 mlrd teńgege artty.
Ulytaý oblysy áleýmettik azyq-túlik taýarlarynyń 4 túri boıynsha ózin-ózi qamtamasyz etedi.