Ulytaý óńiri aýyl sharýashylyǵyn damytý boıynsha josparlaryn tanystyrdy
JEZQAZǴAN. KAZINFORM — Ulytaý oblysy agrosektorynda 2025 jylǵy negizgi kórsetkishter jarııalandy. 2025 jyly agroónerkásiptik keshen sýbektilerin sýbsıdııalaýǵa 4,4 mlrd teńge bólindi, dep habarlaıdy oblys ákimdiginiń baspasóz qyzmeti.
Vedomstvo málimetine sáıkes, bul qarajat shamamen 780 sharýa qojalyǵyna kómek kórsetip, olardyń tehnıkasyn jańartýyna, zamanaýı tehnologııalardy engizýine, óndiris ónimdiligi men básekege qabilettiligin arttyrýyna múmkindik berdi.
Ákimdik aǵymdaǵy jyly qysqy kezeńde mal basyn kútip-ustaýǵa qajetti jem-shóp qorynyń jospary — 545,0 myń tonna ekenin atap ótti.
— Bul kólem maldy tolyqqandy azyqtandyrýdy, josparlanǵan ónim kólemin, tól alýdy jáne mal basynyń saqtalýyn tolyq qamtamasyz etýge jetkilikti. Qazirgi ýaqytta, jergilikti ákimshilikterdiń málimetterine sáıkes 558,0 myń tonna jem-shóp daıyndalǵan, bul jospardan 2,5 paıyzǵa artyq. Jyl basynan óńirimizde 53,6 myń tonna sút, 20,5 myń tonna et jáne 24,7 mln dana jumyrtqa ónimderi óndirildi, — dep jazyldy habarlamada.
Óńirdegi fıtosanıtarııalyq ahýaldy turaqty jáne aýyl sharýashylyǵy daqyldaryn zııandy organızmderden qorǵaý maqsatynda saıaq shegirtkege qarsy 17 220 gektarǵa jáne úıirli shegirtke — ıtalıandyq prýstqa qarsy 10 290 gektar aýmaqqa hımııalyq óńdeý jumystary júrgizildi. 2026 jylǵa jospar saıaq shegirtkege qarsy 23,7 myń gektar aýmaqqa hımııalyq óńdeý jumystaryn júrgizý josparlanyp otyr.
Sonymen qatar, Jezqazǵan qalasynda 500 gektarǵa «Kengir Agro» aýyl sharýashylyǵy óndiristik kooperatıvi jáne Jańaarqa aýdanynda «Birlestik» sharýa qojalyǵy 200 gektarǵa sýarmaly egistik alqabyn qurý jobalary iske qosylýy josparlanǵan.
Joǵaryda atalǵan jobalardy iske asyrý azyq-túlik qaýipsizdigin nyǵaıtady, básekege qabiletti orta qalyptastyrady, sonymen qatar, bul jobalardyń jalǵasy sút — taýar fermalaryn qurýǵa jáne ónimdi tereń óńdeýge baǵyttaıdy.
Sonymen qatar, 2026 jylǵa jalpy somasy 11 mlrd. teńgeni quraıtyn 9 ınvestıtsııalyq jobany iske asyrý josparlanyp otyr. Onyń ishinde, balyq sharýashylyǵy, jyly-jaılarda kókónister egý, sýarmaly egistik alqaptaryn ulǵaıtý baǵytyndaǵy jobalar da bar.