Ulytaý oblysynyń jylytý maýsymyna daıyndyǵy qandaı
JEZQAZǴAN. KAZINFORM — Qazaqstan Respýblıkasynyń Premer-Mınıstri Oljas Bektenov Ulytaý oblysyna jumys sapary aıasynda óńirdiń kommýnaldyq-energetıkalyq sektory nysandaryna baryp, ınfraqurylymdy jańǵyrtý qarqynymen tanysty.
Atap aıtqanda, Úkimet basshysy Sátbaev qalasynyń 70 myńǵa jýyq turǵyny úshin jylý jáne ystyq sý kózi bolyp sanalatyn № 1 jáne № 2 jylý stansalaryn aralady.
Premer-Mınıstrge qazirgi ýaqytta № 1 jylý stansasynda kúrdeli jóndeý jáne 4 qazandyqqa, sondaı-aq gaz qubyrlaryna aǵymdaǵy jóndeý júrgizilip jatqany týraly baıandaldy.
Jezqazǵan JEO-da da jabdyqtardy jańǵyrtý jumystary júrgizilýde. Bul maqsatqa 13,5 mlrd teńge bólindi.
Qazirgi tańda № 5 qazandyq agregatyna kúrdeli jóndeý jasalyp, jumystyń 60%-y oryndaldy, sondaı-aq № 7 qazandyqqa keńeıtilgen-aǵymdaǵy jóndeý josparlanýda.
Qazandyq agregaty men týrboagregattarǵa júrgizilgen jóndeý jumystarynan soń, tozý kórsetkishi 84%-dan 63%-ǵa deıin tómendedi. № 8 qazandyqty jańǵyrtý 70%-ǵa oryndaldy.
Oljas Bektenov óńir basshylyǵyna, sondaı-aq «Qazaqmys» korporatsııasyna jumys qarqynyn arttyrýdy, aldaǵy qysqa daıyndyqty jedel ári sapaly aıaqtaýdy tapsyrdy.
«Halyqty jylýmen jáne ystyq sýmen qamtamasyz etý azamattardyń áleýmettik ál-aýqatyna, sondaı-aq jalpy óńirdegi jaǵdaıǵa áser etedi. „Qazaqmys“ korporatsııasy Jezqazǵan JEO boıynsha, sondaı-aq Sátbaev qalasynyń № 1 jáne № 2 jylý stansalary boıynsha barlyq mindettemelerin oryndaýy tıis. Bul jerde ákimdik pen Korporatsııa arasynda úılesimdi jumys júrgizý qajet. Barlyǵy ýaqytyly jasalýy kerek», — dep tapsyrdy Premer-Mınıstr.
Qazirgi ýaqytta Jezqazǵan JEO-nyń tozýy shamamen 65%-dy quraıdy, Sátbaevtaǵy qazandyqtar 85%-ǵa tozǵan. Ulytaý oblysynda jylytý maýsymyna daıyndyqqa 30,2 mlrd teńge bólindi.
10 qazandyq daıyndaldy, 478 shaqyrym elektr berý jelileri, 29,8 km sý qubyrynyń 22,6 shaqyrymy jóndeldi jáne 46,4 km gaz qubyry salyndy.
