Ulytaý oblysynyń Mıbulaq aýylynda jańa modýldik vetpýnkt paıdalanýǵa berildi
ULYTAÝ. KAZINFORM – Ulytaý oblysynyń Mıbulaq aýylynda jańa modýldik veterınarııalyq pýnkt paıdalanýǵa berildi. Zamanaýı qural-jabdyqtarmen qamtylǵan nysan óńirdegi mal basy eń kóp aýyldyq okrýgterdiń birine qyzmet kórsetetin bolady.
Nysan Qazaqstan Respýblıkasynyń veterınarııa salasyn damytýdyń 2026–2030 jyldarǵa arnalǵan keshendi jospary aıasynda salynǵan.
Jańa veterınarııalyq pýnkt mal emdeýge arnalǵan preparattardy saqtaýǵa arnalǵan tońazytqysh jabdyqtary bar qoımamen, qyzmettik kabınettermen, sanıtarııalyq torappen, kompıýterlik tehnıkamen jáne órt qaýipsizdigi júıesimen qamtamasyz etilgen. Nysan aýmaǵynda jalpy aýdany 600 sharshy metr bolatyn maldy bekitý alańy men qorshaýly qora-jaı jabdyqtalǵan. Munda vaktsınatsııalaý, dıagnostıkalyq zertteýler júrgizý jáne basqa da veterınarııalyq is-sharalar uıymdastyrylady.
Aýyl sharýashylyǵy janýarlaryn birdeılendirýdiń aqparattyq júıesiniń derekterine sáıkes, Mıbulaq aýyldyq okrýginde 17 715 bas iri qara, 32 300 bas usaq mal, 12 630 jylqy jáne 72 túıe tirkelgen.
Veterınarııalyq pýnktte segiz maman jumys isteıdi. Olardyń qatarynda eki veterınarııalyq dáriger, eki veterınarııalyq feldsher jáne úsh veterınarııalyq sanıtar bar. Kóshpeli qyzmetti qamtamasyz etý maqsatynda bólimshe UAZ Pickup Profi jáne Niva Legend avtokólikterimen jabdyqtalǵan.
Salalyq vedomstvonyń málimetinshe, 2026 jyly Ulytaý oblysynda 21 veterınarııalyq pýnkt pen bir veterınarııalyq stantsııanyń qurylysy aıaqtalǵan. Al 2027 jyly óńirde taǵy 11 veterınarııalyq pýnkt pen 17 mal qorymyn salý josparlanyp otyr.
Eske salsaq, Qazaqstanda 2030 jylǵa deıin veterınarııalyq baqylaý júıesin aýqymdy jańǵyrtý kózdelgen. Bul maqsatqa 144,9 mlrd teńge bólingen.
