Ulytaý oblysynyń Densaýlyq saqtaý júıesin damytýdyń keshendi jospary bekitildi
ASTANA. KAZINFORM — QR Densaýlyq saqtaý mınıstrliginde keńes ótip, Ulytaý oblysynyń Densaýlyq saqtaý júıesin damytýdyń keshendi jospary bekitildi. Bul týraly vedomstvonyń resmı saıty habarlady.
Basty maqsat — óńir turǵyndaryna sapaly jáne ýaqtyly medıtsınalyq kómek kórsetý úshin jaǵdaı jasaý. Ol úshin medıtsınalyq nysandardy salý jáne kúrdeli jóndeý, olardy zamanaýı jabdyqtarmen jaraqtandyrý, dárilik zattarmen qamtamasyz etý, sondaı-aq medıtsınalyq kadrlardy daıarlaý jáne tartý jónindegi sharalar kózdelgen.
— Keńeste respýblıkalyq ǵylymı ortalyqtardyń birinshi basshylary sóz sóılep, naqty merzimde joǵary tehnologııalyq baǵyttardy damytý jónindegi is-sharalar josparyn usyndy.
Onkologııa, kardıologııa jáne kardıohırýrgııa, hırýrgııa, neırohırýrgııa, travmatologııa, sondaı-aq bosandyrý jáne balalyq shaq sııaqty negizgi qyzmetterdi damytýǵa erekshe nazar aýdarylady.
Oblysta medıtsınalyq-sanıtarııalyq alǵashqy kómekti nyǵaıtý boıynsha naqty sheshimder qabyldandy, — dep jazdy mınıstrlik.
Keńes qorytyndysy boıynsha Densaýlyq saqtaý mınıstri Aqmaral Álnazarova naqty tapsyrmalar berdi.
Áleýmettik medıtsınalyq saqtandyrý qory Ulytaý oblysynyń medıtsınalyq-sanıtarııalyq alǵashqy kómek uıymdaryna konsýltatsııalyq-dıagnostıkalyq qyzmetterdiń qoljetimdiligi men onkoskrınıngterdiń tıimdiligin qosa alǵanda, medıtsınalyq kómek kórsetýdiń standarttary men qaǵıdalaryn saqtaý turǵysynan jospardan tys monıtorıng júrgizýi qajet.
— Ulytaý oblysynyń densaýlyq saqtaý basqarmasy medıtsınalyq joǵary oqý oryndarymen jáne respýblıkalyq ǵylymı ortalyqtarmen birlesip-medıtsınalyq uıymdardy kadrlarmen jasaqtaý, ınfraqurylymdy damytý, medıtsınalyq kómektiń sapasyn arttyrý jóninde sharalar qabyldasyn, onkologııalyq qyzmetke arnalǵan zamanaýı sáýlelik apparatty ornalastyrý úshin blok salý máselesin sheshsin, — delingen aqparatta.
Budan basqa, 2026 jylǵy 1 qańtardan bastap onkologııalyq skrınıng boıynsha quzyrettilik ortalyqtaryn uıymdastyrý jáne óńir turǵyndaryna sapaly medıtsınalyq kómek kórsetý úshin «Jezqazǵan» medıtsınalyq ortalyǵymen jáne basqa da uıymdarmen ózara is-qımyldy jalǵastyrý tapsyryldy.
Bul sharalardy iske asyrý medıtsınalyq kómektiń qoljetimdiligi men sapasyn barynsha arttyrýǵa, medıtsınalyq mekemelerdiń materıaldyq-tehnıkalyq bazasyn nyǵaıtýǵa, Ulytaý oblysy halqynyń densaýlyǵy men ómir súrý uzaqtyǵyn sapaly jaqsartýǵa múmkindik beredi.
Bıyl tamyz aıynda mınıstr Ulytaý óńirine jumys saparynan soń birshama is atqaryldy. Aımaqtaǵy jaǵdaıdy zerdeleý jáne ony jaqsartý boıynsha keshendi sharalar daıyndaý úshin mınıstrlik mamandarynan, jetekshi ǵylymı ortalyqtar men medıtsınalyq ýnıversıtetterden jumys toby quryldy.
