Ulytaý oblysynyń bıýdjeti 30 mlrd teńgege artty

JEZQAZǴAN. KAZINFORM — Ulytaý oblysynda bıylǵy jartyjyldyqta jalpy óńirlik ónim 1 trln teńge bolyp, 1,1% ósti. Jan basyna shaqqanda bul kórsetkish 4,6 mln teńge boldy. Óńir respýblıka boıynsha úshinshi orynda tur. 

Oblys ákimi Dastan Ryspekovtyń aıtýynsha, 10 aıdyń nátıjesinde kólik jáne qoımalaý, qurylys, turǵyn úıdi paıdalanýǵa berý, ınvestıtsııalar, saýda jáne aýyl sharýashylyǵy salalarynda dınamıka baıqalady.

 Jyl basynan beri óńir ekonomıkasynyń qarqyn alýyna baılanysty oblys bıýdjetiniń kiristeri 29,7 mlrd teńgege nemese 20%-ǵa artyp, 178 mlrd teńge boldy. Oblysta qysqa merzimdi ekonomıkalyq ındıkatordyń 70% ónerkásip salasy quraǵandyqtan, atalǵan ındıkator 99,7 paıyz boldy. Áleýmettik sala oblystyń bıýdjettiń shamamen 50%-y. Sáıkesinshe barlyq áleýmettik mindetteme oryndalyp jatyr, — dedi Dastan Ryspekov elordada Ortalyq kommýnıkatsııalar qyzmetinde.

Ótken jyly ekonomıkany ártaraptandyrý baǵytynda jalpy somasy 34 mlrd teńge bolatyn 9 joba iske qosyldy. Bıyl 138 mlrd teńgelik 17 jańa ınvestıtsııalyq joba júzege asa bastady. Sonyń ishinde munaı bazasy, jel elektr stantsııasy jáne respırator shyǵaratyn zaýyt qurylysy aıaqtaldy.

Sonymen birge, Sátbaev qalasynda ındýstrııalyq aımaq qurylyp, jalpy quny 5 mlrd teńge bolatyn úsh joba pysyqtalyp jatyr.

Aıta keteıik, 2028 jylǵa deıin Ulytaý oblysynda 25 ınvestıtsııalyq joba pýly júzege asady.