Ulytaý oblysynyń ákimi Jezqazǵan temirjol vokzalyndaǵy jańǵyrtý jumystaryn baqylady
JEZQAZǴAN. KAZINFORM — Ulytaý oblysynyń ákimi Eset Baıken jumys sapary barysynda Jezqazǵan qalasyndaǵy temirjol vokzalyn jańǵyrtý jumystarynyń barysymen tanysty.
Búginde nysanda ishki jáne syrtqy qabyrǵalardy tegisteý, shatyr jabyndysyn aýystyrý, ishki árleý, jylý, jeldetý jáne sý burý júıelerin ornatý jumystary tolyq aıaqtalǵan. Qazirgi tańda ǵımarattyń qasbetin árleý jáne ekinshi qabattaǵy ınjenerlik júıelerdi montajdaý jumystary júrgizilýde.
Jańǵyrtý aıasynda vokzalǵa zamanaýı eskalator men lıft ornatylǵan. Ekinshi qabatta jolaýshylarǵa arnalǵan fýdkort ornalasady. Sonymen qatar, múmkindigi shekteýli azamattardyń kedergisiz júrip-turýyna barlyq qajetti jaǵdaı qarastyrylǵan.
Jalpy aýmaǵy 2 500 sharshy metr bolatyn nysandy aralaý barysynda oblys ákimi qasbetti árleýde qoldanylatyn zamanaýı sándik sylaqtyń sapasyna erekshe nazar aýdaryp, qurylys jumystarynyń joǵary deńgeıde oryndalýyn qamtamasyz etýdi tapsyrdy. Sondaı-aq aýmaqty abattandyrý jumystaryn belgilengen merzimde ári sapaly aıaqtaýdy qatań baqylaýda ustaýdy mindettedi.
Aıta keteıik, Memleket basshysynyń tapsyrmasyna sáıkes Ulytaý oblysynda tórt temirjol vokzalyn jańǵyrtý jumystary júzege asyrylýda. Atap aıtqanda, Jezqazǵan jáne Qarajal qalalaryndaǵy vokzaldar, Qyzyljar stantsııasy men Jańaarqa kentindegi temirjol vokzaldary tolyq jańǵyrtylyp jatyr. Barlyq tórt nysandy bıyl paıdalanýǵa berý josparlanǵan.
