Ulytaý oblysynyń ákimi Jezqazǵan qalasyndaǵy aýlalardaǵy oıyn alańdarynyń jaı-kúıin tekserdi
ULYTAÝ. KAZINFORM – Ulytaý oblysynyń ákimi Dastan Ryspekov Jezqazǵan qalasyna jumys sapary barysynda Gogol, Ǵaryshkerler jáne Esenberlın kóshelerindegi aýlalardy aralap, oıyn alańdaryndaǵy qurylys jáne jańǵyrtý jumystarynyń barysymen tanysty.
Óńir basshysy oıyn alańdary paıdalanýǵa berilgennen keıin olardyń qaýipsizdigin qamtamasyz etý jáne uqypty kútim jasaý boıynsha baqylaýdy kúsheıtýdi tapsyrdy. Sondaı-aq turǵyndarmen, ásirese balalar men ata-analarmen múlikti uqypty paıdalaný jóninde túsindirý jumystaryn uıymdastyrýdyń mańyzdylyǵyn atap ótti.
Qurylys jumystary byltyr bastalyp, áli aıaqtalmaǵan jáne jańadan salynyp jatqan alańdardyń sapasy men belgilengen merzimde aıaqtalýyn únemi baqylaýda ustaý qajettigin eskertti.
Oblys ákimi aýlalarda turǵyndardyń jaýapkershiligin arttyryp, ıelik sezimin qalyptastyrý maqsatynda aqparattyq-túsindirý jumystaryn júıeli túrde júrgizýdi tapsyrdy.
Sapar barysynda Dastan Jandaýletuly qala turǵyndarymen kezdesip, olardyń usynys-pikirlerine qulaq asty. Sonymen qatar, oıyn alańdary paıdalanýǵa berilgen soń, qurylys alańdarynda qalǵan qaldyq materıaldar men qoqystardy ýaqytyly joıýdy qatań baqylaýǵa alýdy tapsyrdy. Burynnan qalǵan eski kespe tastardy tazalaý qajettigin de erekshe atap ótti.
Óńir basshysy «Taza Qazaqstan» respýblıkalyq ekologııalyq aktsııasy aıasynda aýlalardyń tazalyǵyn saqtaý – barsha turǵyndardyń ortaq mindeti ekenin jetkizip, belsendi atsalysýǵa shaqyrdy.