Ulytaý oblysynyń aq halatty abzal jandary marapattaldy
JEZQAZǴAN. KAZINFORM — Densaýlyq saqtaý qyzmetkerleriniń kásibı merekesine oraı Ulytaý oblysynyń abzal jandary marapattaldy. Saltanatty is-sharaǵa arnaıy qatysqan óńir basshysy Dastan Ryspekov sala úzdikterin quttyqtap, eńbekterine jemis tiledi.
«Adam ómirinen artyq qymbat eshteńe joq. Al sol ómir men densaýlyqty saqtaý jolynda ýaqytpen sanaspaı eńbek etip júrgen sizderdiń qyzmetterińiz – erekshe qurmet pen alǵysqa laıyq», - dedi oblys ákimi óz quttyqtaýynda.
Mereke qarsańynda uıymdastyrylǵan jıynda oblysymyzdyń birqatar dárigeri QR Densaýlyq saqtaý mınıstrliginiń «Eńbek ardageri» medalimen, «Densaýlyq saqtaý isine qosqan úlesi úshin» tósbelgisimen, «Densaýlyq saqtaý isiniń úzdigi» tósbelgisimen, Densaýlyq saqtaý mınıstrliginiń Qurmet gramotasymen, Ulytaý oblysy ákiminiń, Densaýlyq saqtaý mınıstrliginiń Alǵys hattarymen, Ulytaý oblysynyń Qurmet gramotasymen marapattaldy.
Sonymen qatar sala úzdikterine «AQNIET» salalyq kásipodaǵynyń «Kásipodaqqa sińirgen eńbegi úshin» tósbelgisi, «SENIM» Densaýlyq saqtaý júıesi jumyskerleriniń salalyq kásiptik odaǵy» respýblıkalyq qoǵamdyq birlestiginiń úzdigi» tósbelgisi tabys etildi.
Saltanatty is-sharada óńirdiń densaýlyq saqtaý isine aıryqsha úles qosyp júrgen tulǵalaryna Ulytaý oblysy ákiminiń arnaıy syılyqtary da tartý etildi. Atap aıtar bolsaq, «Úzdik pedıatr», «Úzdik terapevt», «Úzdik hırýrg», «Úzdik sanıtarlyq dáriger», «Densaýlyq saqtaý salasyndaǵy úzdik menedjer», «Statsıonardyń úzdik dárigeri», «Kásibine adaldyǵy úshin», «Bilim berý mekemelerindegi úzdik medıtsına qyzmetkeri», «Úzdik akýsher-gınekolog», «Úzdik jalpy tájirıbeli dáriger», «Úzdik aýyl dárigeri», «Úzdik akýsherka», «Úzdik feldsher», «Alǵashqy medıtsınalyq-sanıtarlyq kómektiń úzdik medbıkesi»,«Statsıonardyń úzdik medbıkesi» anyqtaldy.
Al «Jyl dárigeri» ári bir mıllıon teńgelik sertıfıkatty oblystyq kópbeıindi aýrýhanasy pedıatrııalyq qyzmettiń meńgerýshisi Qaýker Jaqsygeldınova ákiminiń qolynan aldy.
Іs-shara sala mamandaryna arnalǵan kontserttik baǵdarlamamen jalǵasty.
Aıta keteıik, Prezıdenttiń Jarlyǵymen otandyq medıtsınany damytýǵa eleýli úles qosqan mamandar marapattaldy.