Ulytaý oblysynyń 116 jastaǵy turǵyny daýys berdi
JEZQAZǴAN. KAZINFORM — Júz jyldan astam ómir súrgen Túımegúl Temirbaeva Quryltaı saılaýyna qatysyp, óz tańdaýyn jasady. Ol Ulytaý oblysynyń Qyzyljar aýylynda turady jáne Qazaqstandaǵy eń qart azamat sanalady. 1910 jyly dúnıege kelgen Túımegúl apa bıyl 116 jasqa toldy.
Túımegúl Temirbaevanyń el úshin mańyzdy qoǵamdyq-saıası naýqanǵa qatysyp, azamattyq ustanymyn bildirýi el bolashaǵyna degen jaýapkershiliktiń jarqyn kórinisi ári barsha azamatqa úlgi bolarlyq ónege boldy.
Túımegúl apa ómiriniń basym bóligin otbasyna jáne adal eńbekke arnaǵan. Joldasy Aıazbaı Temirbaevpen birge jylqy ósirýmen aınalysyp, ǵumyr boıy mańdaı terimen eńbek etti. Búginde ol 15 nemere men 25 shóbereniń súıikti ájesi.
Uzaq jasaýdyń syry týraly suraǵanda, Túımegúl apa onyń máni adal eńbekte, izgi nıette jáne jaqyndarǵa degen súıispenshilikte ekenin aıtady. Buǵan deıingi suhbattarynda Túımegúl apa áli kúnge deıin úı sharýasyna aralasatynyn, qurt jasaıtynyn jáne qolynan kelgenshe sharýashylyq jumystaryn atqaratynyn aıtqan.
Daýys berý kezinde uzaq jasaǵan ana elge izgi tilegin bildirip, urpaqtaryna densaýlyq pen amandyq, elge tynyshtyq, al Qazaqstanǵa jarqyn bolashaq tiledi.
— Urpaǵymyz aman-saý bolsyn, elimizde beıbitshilik bolsyn. Elimizdiń bolashaǵy jarqyn bolsyn, — dep tilek bildirdi Túımegúl apa.
Túımegúl apanyń tańdaýy — jaı ǵana bir daýys emes. Ol ǵasyrdan astam tarıhty kórgen adamnyń el bolashaǵyna baǵyttalǵan aq batasyndaı boldy.
Aıta keteıik, Túımegúl Temirbaeva buǵan deıin de qoǵamdyq mańyzy bar naýqandarǵa qatysqan. 2026 jylǵy respýblıkalyq referendým kezinde de ol arnaıy jyljymaly daýys berý jáshiginiń kómegimen óz tańdaýyn jasaǵan.
116 jastaǵy uzaq jasaǵan keıýananyń tańdaýy «Eldiń bolashaǵy — árqaısymyzdyń ortaq isimiz» degen qarapaıym ári tereń oıdyń sımvolyna aınaldy.
