Ulytaý oblysyndaǵy bıznes-qoǵamdastyqpen Salyq kodeksindegi túzetýler talqylandy
ASTANA.KAZINFORM - Ulytaý oblysynda Qarjy vıtse-mınıstri Dáýren Temirbekovtiń óńirdegi bıznes-qoǵamdastyqpen kezdesýi ótti. Jıynǵa 200-den astam kásipker qatysty.
Qarjy vıtse-mınıstri Dáýren Temirbekov Úkimettiń dıfferentsıaldy QQS mólsherlemeleri boıynsha usynystaryn tanystyrdy. Bul bastamaǵa sáıkes, QQS-tyń jalpy mólsherlemesin 16% deńgeıinde belgileý usynylady, al aýyl sharýashylyǵy ónimderin óndirýshiler salyqtan tolyq bosatylady. Keıbir salalar úshin 10% aralyq mólsherleme engizilmek. Osylaısha, Úkimet usynǵan QQS mólsherlemeleriniń dıfferentsıatsııasy kelesideı: 16%, 10%, 0%, salyqtan bosatý.
Kezdesý barysynda jergilikti kásipkerler salyq zańnamasyna engiziletin ózgeristerge qatysty óz pikirlerin bildirdi. Bıznes-qoǵamdastyq atynan Ulytaý oblysynyń Kásipkerler jáne ónerkásipshiler qaýymdastyǵynyń tóraıymy Nadejda Kım, Óńirlik keńes múshesi, «Jangaskınova» JK negizin qalaýshy Sholpan Jangaskınova, Jańaarqa aýdany máslıhatynyń depýtaty, «Eralıev» AÓK tóraǵasy, «Qoǵaly kól» sharýa qojalyǵynyń basshysy Janbolat Jýanyshbaev jáne basqa da kásipkerler sóz sóıledi.
Ulttyq ekonomıka mınıstrliginiń Salyq jáne keden saıasaty departamentiniń dırektory Erlan Saǵynaev QQS mólsherlemesiniń kóterilýi úı mańyndaǵy dúkenderge, meıramhanalarǵa, sulýlyq salondaryna jáne basqa da bólshek saýda nysandaryna áser etpeıtinin atap ótti.
Ulytaý oblysy Kásipkerler palatasynyń dırektory Gúlmıra Qajenova óńirlik bıznes ókilderimen mundaı kezdesýler «Halyq únine qulaq asatyn memleket» tujyrymdamasynyń jumys istep jatqanyn kórsetetinin aıtty. Óz kezeginde, «Atameken» UKP árbir zańnamalyq bastama kásipkerler men ınvestorlardyń múddelerin eskere otyryp, jan-jaqty taldanady dep kútedi.
Kezdesý qorytyndysy boıynsha óńirlerdegi bıznes ókilderiniń pikiri salyq reformalaryn odan ári jetildirý barysynda mindetti túrde eskeriletini atap ótildi.
Úkimet QQS 16% bolsa, áleýmettik salyq pen zeınetaqy jarnalaryn tóleý ózgerissiz qalatyny týraly usynys aıtqan bolatyn.