Ulytaý oblysyndaǵy aýyldan 30 otbasy tasqyn sýǵa baılanysty qaýipsiz jerge kóshirildi
ULYTAÝ. KAZINFORM – Ulytaý oblysynyń Jezdi aýylynda 10 úıdi, Taldysaı aýylynda 8 úıdi sý basty. Jezdi aýylynda tótenshe jaǵdaı jarııalandy.
Naýryzdyń 28-ne qaraǵan túni Ulytaý aýdanynyń Jezdi aýylynda 10 úıdi sý basyp, 26 otbasy qaýipsiz jerge kóshirilgen edi.
Oblys ákimi Berik Ábdiǵalıuly Jezdi kentinde baspanasyn sý basqan azamattarmen kezdesip, shyǵynǵa ushyraǵan otbasylar ýaqytsha oryndarǵa kóshiriletinin, tótenshe jaǵdaı aıasynda barlyq kómek kórsetiletinin jetkizdi.
«Zardap shekken otbasylar túgel qaýipsiz jerge kóshirilsin. Máseleni túske deıin sheshýdi tapsyramyn. Merdiger anyqtalyp, saraptama jasalǵan soń barlyq shyǵyn óteledi» - dedi óńir basshysy óz sózinde.
Qazirgi ýaqytta jergilikti atqarýshy organnan 15, Tótenshe jaǵdaılar departamentinen 50-ge jýyq, Polıtsııa departamentinen 30-dan astam qyzmetker, jalpy sany 13 tehnıka men 3 sorǵy jumys isteýde.
Sondaı-aq, keshe túngi saǵat 22:30-da Ulytaý selosyna qarasty Taldysaı eldimekeninde qardyń qarqyndy erýine jáne jer asty sýynyń kóterilýine baılanysty 8 jeke úı sý astynda qalyp, sý deńgeıi 50 sm-ge jetken bolatyn.
Jergilikti atqarýshy organnyń 30-ǵa jýyq qyzmetkeri, TJ departamenti men Polıtsııa departamenti qyzmetkerleriniń arqasynda jáne jalpy sany 6 tehnıkanyń kúshimen Jezdi kentine 20 adam (onyń ishinde 5 bala jáne 7 áıel) evakýatsııalanǵan. Sondaı-aq qaýipsiz jerge júzden astam ІQM men usaq mal shyǵaryldy.
Taldysaı eldimekeninen Jezdi kentine qonystandyrylǵan 8 úıdiń ıeleri úshin eki ortaǵa tańerteń jáne keshke kólik qatynaıdy. Sondaı-aq tabıǵı apattan zardap shekken baspanalar shyǵyny óteledi. Búgin Ulytaý oblysynyń ákimi Berik Ábdiǵalıuly úı-jaıyn qyzyl sý shaıǵan taldysaılyqtarmen kezdesip, kórsetiletin kómek túrlerin aıtty.
