Ulytaý oblysynda 218 mln teńge memleketke qaıtaryldy — Prokýratýra
JEZQAZǴAN. KAZINFORM — Jezqazǵan qalasynyń turǵyn úı-kommýnaldyq sharýashylyq bólimi joǵarylatylǵan baǵa boıynsha qurylys jumystary qabyldanǵany anyqtaldy. Bul týraly Ulytaý oblysynyń prokýratýrasy málim etti.
«Prokýrorlyq tekserý nátıjesinde negizsiz tólengen bıýdjet qarajatynyń somasy 218 mln teńge boldy. Quqyq buzýshylyqtar joıyldy, turǵyn úı-kommýnaldyq sharýashylyq bóliminiń burynǵy basshysy abaısyzda aýyr zardaptarǵa ákep soqqan nemquraılylyq úshin Qylmystyq kodekstiń 372-baby boıynsha jaýapqa tartyldy», — delingen habarlamada.
Búgingi tańda atalǵan soma memleket kirisine óz erkimen qaıtaryldy.
Eske sala keteıik, aktıvterdi qaıtarý boıynsha júrgizilip jatqan jumystar aıasynda tizilim sýbektilerimen 12 mlrd teńgege áleýmettik jobalardy iske asyrý boıynsha 4 kelisimge qol qoıyldy.
